अहमदपूर (जि. लातूर) : एका महिलेने स्वत:चे एका ७२ वर्षीय व्यक्तीसोबत अश्लील चित्रीकरण करून दोघा साथीदाराच्या साहाय्याने सदरील व्यक्तीस धमकी देत १४ लाखांची खंडणी वसूल केली. दरम्यान, आणखी एक लाख रुपये खंडणी घेताना पोलिसांनी रंगेहात पकडले. याप्रकरणी महिलेसह तिघांविरुद्ध बुधवारी गुन्हा दाखल करण्यात आला आहे.
पोलिसांनी सांगितले, अहमदपुरातील भारत काॅलनीतील रूपाली ढगे व मुसा अल्लाउद्दीन शेख आणि जाकीर गुलाबसाब शेख (रा. चारटांगी, अहमदपूर) यांनी कट रचून उदगीर तालुक्यातील सुकणी येथील शेतकरी विठ्ठल दिगंबर मुळे (वय ७२) यांची संपूर्ण माहिती काढली. त्यानंतर मागील महिन्यात ते विठ्ठल मुळे यांच्या शेतात गेले आणि त्यांना मद्य पाजले.
दरम्यान, अश्लील चित्रीकरण केले. त्यानंतर ५ मे ते १५ जूनपर्यंत आरोपी असलेल्या दोघांनी आम्ही पोलीस आहोत, तुझ्या विरोधात बलात्काराचा गुन्हा दाखल करतो, अशी धमकी देत पहिल्या वेळी १० लाख, दुसऱ्यावेळी ४ लाख असे एकूण १४ लाख रुपये सुकणी, शिरूर ताजबंद व तळेगाव रोड अहमदपूर येथे खंडणी वसूल केली. त्यानंतर आरोपी महिला व तिचे साथीदार पुन्हा वेळोवेळी पैशांची मागणी करू लागले. तेव्हा मुळे यांनी अहमदपूर पोलीस ठाणे गाठून माहिती दिली.
दरम्यान, १५ जून रोजी आणखीन दोन लाखांची मागणी केली; परंतु तडजोडीनंतर एक लाख द्यायचे ठरले. त्यानुसार अहमदपूर बसस्थानकात बुधवारी दुपारी ४ वाजता ठरलेला व्यवहार करताना पोलिसांनी आरोपीस रंगेहात पकडले. याप्रकरणी बुधवारी रात्री उशिरा अहमदपूर पोलिसांत गुन्हा दाखल करण्यात आला आहे.
या प्रकरणाचा तपास उपविभागीय पोलीस अधिकारी बलराज लंजिले, पोलीस निरीक्षक चितांबर कामठेवाड यांच्या मार्गदर्शनाखाली सहायक पोलीस निरीक्षक रामचंद्र केदार हे करीत आहेत. या प्रकरणातील आरोपी मुसा शेख यास व्यवहार करताना, तर रूपाली ढगे हीस काळेगाव रस्त्यावरून अटक करण्यात आली आहे. तिसरा आरोपी जाकीर शेख फरार आहे.