अजित पवारांचा मोठा पुतण्या शरद पवारांच्या भेटीला; मोठे बंधू पुन्हा सक्रीय, चर्चांना उधाण

पहिल्या शपथविधीवेळी अजित पवारांना पुन्हा आणण्यात श्रीनिवास पवारच महत्वाचा दुवा ठरले होते. अजित पवार कुठे गेले असा शोध राज्यभरात सुरु होता, तेव्हा अजित पवार हे मोठ्या भावाच्याच घरी होते.

महाराष्ट्रात काका-पुतण्याचे राजकारण रंगले असताना पवार कुटुंबीय पुन्हा एकत्र येणार की काय अशा चर्चा सुरु झाल्या आहेत. पहिल्या पहाटेच्या शपथविधीवेळी अजित पवार ज्या भावाच्या घरी थांबले होते, त्या भावाचा मुलगा आज शरद पवारांच्या भेटीला आला होता. यामुळे विविध चर्चांना उधाण आले आहे. 

अजित पवार यांचे मोठे बंधू श्रीनिवास पवार यांचा मुलगा युगेंद्र पवार यांनी आज मुंबईत वाय बी सेंटर येथे शरद पवारांची भेट घेतली. या भेटीनंतर लगेचच अजित पवार यांना श्रीनिवास पवार यांनी निरोप धाडत घरी बोलवून घेतले. यामुळे शरद पवारांविरोधात बंडाची तलवार उपसणारे अजित पवार पुन्हा माघारी येतात की काय अशी चर्चा सुरु झाली आहे. 

अजित पवारांच्या बंडामुळे पवार कुटुंबावर याचा परिणाम दिसू लागला आहे. अजित पवारांनी थेट शरद पवारांच्या वयावर आघात करत त्यांच्या वेळोवेळच्या वागण्यावरच प्रश्नचिन्ह उपस्थित केल्याने पवार कुटुंबातील दरी वाढू लागली आहे. अशातच आता अजित पवारांचे मोठे बंधू श्रीनिवास पवार सक्रीय झाले आहेत. अर्थातच पवार कुटुंबातूनच या हालचाली सुरु झाल्या आहेत. 

पहिल्या शपथविधीवेळी अजित पवारांना पुन्हा आणण्यात श्रीनिवास पवारच महत्वाचा दुवा ठरले होते. अजित पवार कुठे गेले असा शोध राज्यभरात सुरु होता, तेव्हा अजित पवार हे मोठ्या भावाच्याच घरी होते. यावेळी शरद पवार यांच्या पत्नी प्रतिभा पवार यांनी संपर्कात राहत सर्व सुत्रे फिरविली होती. आताची परिस्थिती वेगळी आहे. अजित पवारांनी काकांविरोधात टीका करण्यास सुरुवात केली आहे. यामुळे खूपच ताणले जाण्यापेक्षा ते मिटविण्याचा प्रयत्न सुरु झाला आहे.