बोरीवली, सीएसएमटीनंतर पवईतही विकृत चाळे

बोरीवली, सीएसएमटीपाठोपाठ पवईच्या एका नामांकित कॉलेजबाहेर विद्यार्थिनींसमोर दुचाकीस्वाराने अश्लील चाळे केल्याची घटना गुरुवारी घडली.

लोकमत न्यूज नेटवर्कमुंबई : बोरीवली, सीएसएमटीपाठोपाठ पवईच्या एका नामांकित कॉलेजबाहेर विद्यार्थिनींसमोर दुचाकीस्वाराने अश्लील चाळे केल्याची घटना गुरुवारी घडली. या प्रकरणी पवई पोलीस अधिक तपास करीत आहेत.पवई हिरानंदानी परिसरातील एका कॉलेजबाहेर दुपारी १२च्या सुमारास हा प्रकार घडला. चार विद्यार्थिनी गेटमधून प्रवेश करत असताना अचानक समोर आलेल्या दुचाकीस्वाराने त्यांच्यासमोर अश्लील चाळे करण्यास सुरुवात केली. विद्यार्थिनींनी तत्काळ याची माहिती पोलीस नियंत्रण कक्षास दिली. त्या माहितीच्या आधारे दोन पोलीस घटनास्थळी दाखल झाले. तेव्हा पोलिसांनी मुलींनाच तेथून पळवून लावल्याच्या घटनेने तीव्र पडसाद उमटले.या प्रकरणी सोशल मीडियावर वाचा फोडताच पोलिसांनी या प्रकरणाची दखल घेतली. पवई पोलिसांनी मुलीचा जबाब नोंदवून अधिक तपास सुरू केला आहे. तसेच संबंधित पोलिसांचीही चौकशी करून योग्य ती कारवाई केली जाणार असल्याची माहिती पोलीस प्रवक्त्या रश्मी करंदीकर यांनी दिली.