अनसिंग येथे संदल मिरवणुकीत तणाव

दुकानांची तोडफोड, चाकुहल्ल्यात एक गंभीर, दगडफेकीत पोलीस अधिकारी जखमी.

अनसिंग: येथील मस्तानशाह बाबा यांच्या संदल मिरवणुकीमध्ये दोन गटांतील वादाचे पर्यावसान दगडफेकीत झाले. या दगडफेकीत पोलीस अधिकारी जखमी झाले आहेत. दरम्यान, जमावाने अनेक दुकानांची तोडफोड केली. यावेळी एका तरुणावर चाकुहल्ला करण्यात आला. यामध्ये गंभीर जखमी झालेल्या तरुणाला अकोला येथे उपचारासाठी हलविण्यात आले आहे. ही घटना बुधवारी रात्री साडेनऊ वाजताच्या सुमारास घडली. येथील मस्तानशाह बाबा यांची संदल मिरवणूक सायंकाळी मुस्लीम चौकातून काढण्यात आली. संदल गांधी चौकाजवळ आल्यानंतर दोन गटांत किरकोळ कारणावरून वाद झाला. त्यानंतर दगडफेक सुरु झाली. दोन्ही बाजूने झालेल्या दगडफेकीत पोलिसांसह काही जण जखमी झाले आहेत. याचवेळी चिंतामन डांगे या तरुणावर अज्ञात व्यक्तीने धारदार शस्त्राने चाकुहल्ला केला. गंभीर जखमी अवस्थेत त्याला अकोला येथे उपचारासाठी हलविण्यात आले. दरम्यान, जमावाने गांधी चौकातील अनेक दुकानांची तोडफोड केली. सध्या गावात तणावपूर्ण शांतता आहे. पोलीस अधीक्षक प्रशांत होळकर, उपविभागीय पोलीस अधिकारी दत्तात्रय वाळके तसेच महसूल विभागाचे सर्व अधिकारी घटनास्थळी पोहोचले आहेत. याप्रकरणी आरोपींवर गुन्हा दाखल करण्याची प्रक्रिया वृत्त लिहेपर्यंत सुरूच होती.