Buldhana Bus Accident: समृद्धी महामार्गावर खासगी प्रवासी बसला अपघात होऊन बसने पेट घेतल्याने बसमधील २५ जणांचा मृत्यू झाला आहे. हा भीषण अपघात सिंदखेड राजा नजीक पिंपळखुटा फाट्याजवळ पहाटे दीड वाजेच्या सुमारास घडला. बसमध्ये एकूण ३३ प्रवासी होते. यामधील आठ प्रवासी सुखरुप आहेत. या महामार्गावरून जाणाऱ्या इतर प्रवाशांनी या अपघातग्रस्तांची वेळीच मदत केली असती, तर आणखीही जीव वाचले असते, असा दावा घटनास्थळी बचावकार्य करणाऱ्या काहींनी केला आहे.
अपघातानंतर बसच्या मागील बाजूच्या खिडकीच्या काचांवर हात आपटून काही प्रवासी मदतीसाठी गयावया करत होते. पण आजूबाजूने जाणारे इतर वाहन चालक मदतीसाठी थांबले नाहीत, असा दावाही काही प्रत्यक्षदर्शींनी केला आहे. आपल्या डोळ्यांदेखतच एका बाळाचा जळून मृत्यू झाल्याचे एका प्रत्यक्षदर्शी व्यक्तीने सांगितले आहे.
एक महिला बाळासह काचेवरती हात आपटत सुटकेची याचना करत होती...
आग लागल्यामुळे आतून प्रवाशांना काचा फोडणे शक्य झाले नाही. परंतु आजूबाजूने जाणारे ट्रक, टेम्पो आणि इतर चालक थांबले नाहीत, त्यांनी आपल्याकडील लोखंडी रॉडने काचा फोडण्यास मदत केली असती, तर मृतांचा आकडा कमी असता,असे काहींनी म्हटले आहे. तर बसच्या मागील बाजूला एक महिला आपल्या बाळासह काचेवरती हात आपटत आपटत सुटकेची याचना करत होती, मात्र आमच्या डोळ्यांदेखतच त्यांचा जळून कोळसा झाला, असे ते म्हणाले
दरम्यान, या घटनेबद्दल राज्याचे मुख्यमंत्री एकनाथ शिंदेयांनी शोक व्यक्त केला आहे. तसेच, अपघातातील मृतांच्या नातेवाईकांना राज्य सरकारच्यावतीने पाच लाखांची मदत मुख्यमंत्र्यांनी जाहीर केली आहे. दुसरीकडे, या घटनेबद्दल पंतप्रधान नरेंद्र मोदी यांनी शोक व्यक्त केला असून, बुलढाणा येथील बस दुर्घटनेत मृत्युमुखी पडलेल्यांच्या नातेवाईकांना PMNRF कडून २ लाखांची मदत दिली जाणार आहे आणि जखमींना ५० हजारांची मदत केली गेली आहे.