लोकमत न्यूज नेटवर्कमुंबई : नशेसाठी मोटारसायकल चोरी करणाऱ्या एका हाय-प्रोफाइल चोराला सोमवारी चारकोप पोलिसांनी अटक केली. त्याच्याकडून चोरीच्या गाड्यादेखील पोलिसांनी हस्तगत केल्या असून, चौकशी सुरू आहे.मिलिंद मनोहर सावंत (२१) असे अटक करण्यात आलेल्या संशयित इसमाचे नाव आहे. ज्याचे बारावीपर्यंत शिक्षण झाले आहे. मात्र चुकीची संगत मिळाल्याने त्याला अमलीपदार्थांचे सेवन करण्याची सवय लागली. त्यामुळे त्याने बाइकची चोरी करून विकण्यास सुरुवात केली. यातून मिळणाऱ्या पैशातून तो अमलीपदार्थांची खरेदी करून स्वत:ची गरज भागवायचा. याची माहिती चारकोप पोलिसांना मिळाल्यानंतर त्यांनी सावंतच्या मुसक्या आवळल्या. भाऊ वकील असल्याने सावंतने पोलिसांनाही अरेरावी केल्याचे सूत्रांचे म्हणणे आहे. त्याच्याकडून पाच चोरीच्या मोटारसायकली हस्तगत करण्यात आल्या आहेत. त्याच्यावर चारकोपसह कांदिवली, गोरेगाव, मालाडमध्येही अशा प्रकारचे अनेक गुन्हे दाखल असल्याचे पोलिसांचे म्हणणे आहे.
हाय-प्रोफाइल बाइकचोर अटकेत
By admin | Published: July 11, 2017 2:44 AM