भिगवण : पुणे-सोलापूर महामार्गावर भादलवाडी गावच्या हद्दीतील हॉटेल श्री व्हेज समोरून २६ लाख २४ हजार ६०० रुपयांची चोरी करणार्‍या भामट्यांना वालचंदनगर पोलिसांनी २४ तासांच्या आत अटक केली आहे. चोरांकडील रक्कम हस्तगत केली आहे. विकास असोसिएट्स उरुळी कांचन कंपनीत काम करणारा अनिल शुभकर्ण मंडेलिया (रा.हिलमिस्ट गार्डन, एनआयबीएम रोड, पुणे) हा कंपनीचे पैसे वसूल करून, गाडी चालक अरविंद जालिंदर देशमुख याच्यासह पुण्याहून सोलापूरकडे निघाले होते. नाष्ट्यासाठी भादलवाडी गावच्या हद्दीतील हॉटेल श्री व्हेजसमोर मारुती डिझायर (एमएच १२-जीझेड- ५४४०) उभी केली असताना, नाष्ट्यानंतर गाडीतील काळ्या रंगाच्या बॅगेत असलेले २६ लाख २४ हजार ६०० रुपयांची चोरी झाल्याचे लक्षात आले. बारामती उपविभागीय पोलीस अधिकारी संभाजी कदम यांनी घटनास्थळाला भेट दिली. भिगवण पोलीस चौकीत आरोपींची चौकशी केली. या वेळी पोलीस निरीक्षक अनिल विभुते, प्रशांत काळे यांनीही कसून तपास केला. पुढील तपास पोलीस निरीक्षक अनिल विभुते यांच्या मार्गदर्शनाखाली एएसआय अविनाश काळे, धनंजय राऊत, संजय जाधव, दत्तात्रय खुटाळे, संजय देवकाते, गोरख पवार, कमलेश होले आदी करीत आहेत. (वार्ताहर)
हॉटेल लुटणार्‍या भामट्यांना अटक
By admin | Published: May 14, 2014 5:48 AM