स्फोटकांसह परभणीमध्ये पकडला इसिसचा हस्तक

इसिस या दहशतवादी संघटनेच्या संपर्कात असलेल्या मोहंमद शाहीद मोहंमद कादर अली खान (२४) या हस्तकाला दहशतवादविरोधी पथकाने परभणीतून स्फोटकांसह अटक केल्याने खळबळ उडाली आहे

एटीएसची दुसरी मोठी कारवाई; २ बॉम्ब जप्तऔरंगाबाद/परभणी : इसिस या दहशतवादी संघटनेच्या संपर्कात असलेल्या मोहंमद शाहीद मोहंमद कादर अली खान (२४) या हस्तकाला दहशतवादविरोधी पथकाने परभणीतून स्फोटकांसह अटक केल्याने खळबळ उडाली आहे. परभणीतून झालेली ही दुसरी अटक असल्याने ‘इसिस’ने मराठवाड्यात खोलवर शिरकाव केल्याच्या संशयाला पुष्टी मिळाली आहे. मराठवाड्यातील सुमारे शंभर तरुण बेपत्ता असून, ते इसिसच्या संपर्कात असल्याची भीती व्यक्त करण्यात आली आहे. त्या दृष्टीने आम्ही तपास करत आहोत, अशी माहिती एटीएस प्रमुख अतुलचंद्र कुलकर्णी यांनी दिली. दहा दिवसांपूर्वी परभणीतूनच इसिसशी संबंधित नासेरबिन अबूबकर याफई चाऊस याला एटीएसने अटक केली होती. नासेरबिन याने बॉम्ब बनवून त्याचे फोटो सीरियातील इसिसच्या हस्तकाला पाठविले होते. एक किलो आयईडी (इम्प्रोव्हाइज्ड एक्सप्लोझिव डिव्हाइस) आणि दोन बॉम्ब शाहीदकडेच असल्याची माहिती नासेरकडून मिळाल्यानंतर औरंगाबाद एटीएसच्या विशेष पथकाने शनिवारी रात्री शाहीदला परभणी येथील कादराबाद प्लॉट परिसरातून अटक केली. नासेरबीन आणि शाहीद हे सीरियातील फारूख या दहशतवाद्याशी इंटरनेटद्वारे संपर्कात होते. शाहीदकडे सापडलेल्या स्फोटकाचा नमुना फॉरेन्सिक लॅबकडे पाठविण्यात आला आहे. (प्रतिनिधी)शाहीदला २९ जुलैपर्यंत एटीएस कोठडीएटीएसने कडक बंदोबस्तात शाहीदला रविवारी दुपारी औरंगाबादेतील विशेष न्यायालयाचे न्यायाधीश एस. एल. पठाण यांच्यासमोर हजर केले. न्यायालयाने त्यास २९ जुलैपर्यंत पोलीस कोठडी सुनावली. या संशयित अतिरेक्यास एटीएसने उचलल्याची माहिती मिळाल्यापासून, प्रसारमाध्यमाच्या प्रतिनिधींनी कोर्टात गर्दी केली होती. त्या वेळी इन-कॅमेरा सुनावणी झाली. नासेरबीन आणि शाहीद यांनी सीरियातील फारूख या दहशतवाद्याकडून बॉम्ब तयार करण्याचे साहित्य व तंत्र याची आॅनलाइन माहिती मिळवली. त्यानुसार त्यांनी डिटोनेटर्स, आरडीएक्स, आयईडी आणि अन्य साहित्य जमा केले होते. औरंगाबाद, नागपूर आणि हैदराबाद या शहरांत ईददरम्यान बॉम्बस्फोट घडविण्याचा कट त्यांनी रचला होता. मात्र, ईदच्या पार्श्वभूमीवर पोलिसांनी कडक बंदोबस्त ठेवल्याने या दोघांना कोणत्याही हालचाली करता आल्या नसल्याचे सूत्रांकडून समजले.पालकांनो, मुलांवर लक्ष ठेवा!गेल्या दोन वर्षांत विमानतळावरून १०० पेक्षा अधिक तरुणांना परत आणून त्यांचे मतपरिवर्तन करण्यात आले आहे. त्यांच्यावर कुठलाही गुन्हा दाखल न करता समज देण्यात आली आहे. पालकांनी आपल्या मुलांवर लक्ष ठेवण्याची गरज आहे. तो चुकीच्या मार्गावर जाऊ नये, यासाठी काळजी घेतली पाहिजे. इंटरनेटचा वापर जबाबदारीने आणि योग्य पद्धतीने करावा. - अतुलचंद्र कुलकर्णी(एटीएस, प्रमुख)आजीच्या घरी दडविली स्फोटके शाहीद खान याने परभणीतच आजीच्या घरी दडवून ठेवलेल्या आयईडीसह डिटोनेटर्सचा साठा एटीएसने जप्त केला. ही स्फोटके त्याने पाण्याच्या बाटल्यांच्या बॉक्समध्ये दडवून ठेवले होते, असे सूत्राने सांगितले.100तरुण इसिसच्या संपर्कात?मराठवाड्यातील १०० तरुण बेपत्ता असून, ते इसिसच्या संपर्कात असावेत. त्यामुळे त्यांचा शोध घेऊन कसून चौकशी करावी, अशी मागणी शिवसेनेचे परभणी येथील आमदार राहुल पाटील यांनी शुक्रवारी विधानसभेत शून्यप्रहरात केली होती. मराठवाड्यातील युवक चुकीच्या मार्गाने जात असून, बेपत्ता युवकांचा शोध सुरू आहे. एका तरुणाच्या लॅपटॉपमध्ये तीन हजारांपेक्षा अधिक छायाचित्रे सापडली असून, त्या प्रत्येक छायाचित्राचा अर्थ काय, याचा शोध एटीएसकडून सुरू आहे, असे एटीएस प्रमुख अतुलचंद्र कुलकर्णी यांनी लातूर येथे सांगितले.