पूर्वाश्रमीच्या प्रेयसीच्या हल्ल्यात प्रियकराच्या भावाचा मृत्यू

अनेक वर्षांपासूनचे प्रेमसंबंध तोडल्याने संतापलेल्या विवाहित प्रेयसीने पूर्वाश्रमीच्या विवाहित प्रियकरावर घरी जाऊन हल्ला केला.

संगमनेर (जि. अहमदनगर) : अनेक वर्षांपासूनचे प्रेमसंबंध तोडल्याने संतापलेल्या विवाहित प्रेयसीने पूर्वाश्रमीच्या विवाहित प्रियकरावर घरी जाऊन हल्ला केला. या वेळी मध्यस्थी करणाऱ्या प्रियकराच्या भावाला जीव गमवावा लागला. शनिवारी रात्री साडेआठ वाजताच्या सुमारास शहरातील जनतानगरमध्ये हा थरारक प्रकार घडला. पोलिसांनी आरोपींना अटक केली आहे. शहरालगतच्या लक्ष्मीनगर येथे राहणाऱ्या मीना शिवाजी सोनवणे हिचे राजेंद्र चंद्रकांत झांबरे (३०, रा. जनतानगर) याच्याशी गेल्या ४ वर्षांपासून प्रेमसंबंध होते. मात्र झांबरेने ६ महिन्यांपूर्वी हे प्रेमसंबंध तोडले होते. याचा राग मनात धरून मीना शनिवारी रात्री आपला मुलगा सोनू, सुशीला विलास देवकर व इतर दोघांना बरोबर घेऊन राजेंद्र याच्या घरी गेली. तेथे त्यांच्यात कडाक्याचे भांडण झाले. त्या वेळी राजेंद्रचा भाऊ रमाकांत (२५) भांडण सोडविण्यासाठी गेला. मीना व इतरांनी त्यालाही लाथा-बुक्क्यांनी मारहाण केली. तसेच त्याच्या डोक्यात कुकर घातला. त्यात घाव वर्मी बसल्याने रमाकांतचा जागीच मृत्यू झाला. पोलिसांनी या प्रकरणी मीना शिवाजी सोनवणे, सोनू शिवाजी सोनवणे (दोघे रा. लक्ष्मीनगर), सुशीला विलास देवकर (रा. घुलेवाडी) व अन्य दोघांविरुद्ध गुन्हा दाखल करून रविवारी यातील तिघांना अटक केली. न्यायालयाने त्यांना पाच दिवसांची पोलीस कोठडी सुनावली आहे. (प्रतिनिधी)