‘तो’ आवाज सुप्रिया सुळेंचा...; देवेंद्र फडणवीसांसोबत अजित पवारांनीही स्पष्टच सांगितलं

Maharashtra Assembly Vidhan Sabha Election 2024 Bitcoin Scam: या प्रकरणी करण्यात आलेले आरोप गंभीर आहेत. याची सखोल चौकशी होऊन त्यातील सत्य बाहेर येणे, हा जनतेचा अधिकार आहे, असे देवेंद्र फडणवीस यांनी म्हटले आहे.

Maharashtra Assembly Vidhan Sabha Election 2024: एकीकडे महाराष्ट्र विधानसभा निवडणुकीची मतदानाची प्रक्रिया होत असताना दुसरीकडे बिटकॉइन स्कॅमचा मुद्दा चांगलाच गाजताना पाहायला मिळत आहे. माजी आयपीएस अधिकारी रवींद्र पाटील यांनी काँग्रेस प्रदेशाध्यक्ष नाना पटोले आणि राष्ट्रवादी काँग्रेस शरदचंद्र पवार गटाच्या खासदार सुप्रिया सुळे यांच्यावर निवडणुकीत परकीय चलन वापरणे तसेच निवडणुकीतील आर्थिक व्यवहारांसाठी बिटकॉइनचा वापर केल्याचा आरोप केला आहे. यानंतर भाजपा प्रवक्ते सुधांशू त्रिवेदी यांनीही काही ऑडिओ क्लिप शेअर करत आरोप केले. यावरून आता राजकीय वातावरण तापताना पाहायला मिळत आहे. उपमुख्यमंत्री देवेंद्र फडणवीस यांनी याबाबत स्पष्ट शब्दांत प्रतिक्रिया दिली. 

उपमुख्यमंत्री देवेंद्र फडणवीस यांनी मतदानाचा हक्क बजावल्यानंतर पत्रकारांशी बोलताना बिटकॉइन स्कॅमबाबत स्पष्ट शब्दांत प्रतिक्रिया दिली. मीडियातून या सर्व गोष्टी पाहिल्या आहेत. यासंदर्भात योग्य चौकशी व्हायला हवी, असे माझे स्पष्ट मत आहे. या प्रकरणात नेमके काय खरे आहे, हे सर्वांसमोर आले पाहिजे. कारण या प्रकरणी करण्यात आलेले आरोप गंभीर आहेत. अशा गंभीर आरोपांची सखोल चौकशी होऊन त्यातील सत्य बाहेर येणे, हा जनतेचा अधिकार आहे, असे देवेंद्र फडणवीस यांनी स्पष्टपणे सांगितले. 

हे देशाच्या सुरक्षेसंबंधीचे प्रकरण आहे

बिटकॉइन स्कॅमप्रकरणी उपमुख्यमंत्री अजित पवार यांनाही प्रतिक्रिया विचारण्यात आली होती. ऑडिओ क्लिपमधील आवाज सुप्रिया सुळेंचा असल्याचे अजित पवार यांनी म्हटले. याबाबत देवेंद्र फडणवीस यांना प्रश्न विचारण्यात आला. यावर बोलताना, आवाज सुप्रिया सुळेंसारखा असल्याचे वाटत आहे. आपण म्हणू शकतो की आवाज सुप्रिया सुळेंचा आहे. पण निष्पक्षतेसाठी ‘दूध का दूध, पाणी का पाणी’ होऊन जाऊद्या. जर कोणी आवाजात छेडछाड केली असेल, तर एआयच्या मदतीने त्याला उलगडा केला जाऊ शकतो. हे बिटकॉइन शेकडो कोटी रुपयांचे आहेत. हे प्रकरण निवडणुकीसंबंधीचे असल्याचे मानता येत नाही, हे देशाच्या सुरक्षेसंबंधीचे प्रकरण आहे, असे देवेंद्र फडणवीस यांनी सांगितले.

दरम्यान, सुप्रिया सुळे आणि नाना पटोले यांच्यावर आरोप करण्यात आले आहेत, ते माजी आयपीएस अधिकाऱ्यांनी केलेले आहेत. काही क्लिप्स सादर करण्यात आल्या आहेत. हे प्रकरण खूप गंभीर आहे, त्यामुळे याची सखोल चौकशी झाली पाहिजे. असे आरोप केल्यानंतर सत्य काय आहे, हे जगासमोर येणे गरजेचे आहे. याची चौकशी करून याचा अहवाल लोकांसमोर आला पाहिजे, अशी मागणी देवेंद्र फडणवीस यांनी केली.