ऑनलाइन लोकमत
पुणे, दि. 24- बारामती तालुक्यातील चिंकारा जातीच्या हरणांसाठी प्रसिद्ध असणाऱ्या मयूरेश्वर अभयारण्यातील चिंकारा हरणांची संख्या वाढल्याचे बुद्ध पौर्णिमेला केलेल्या प्राणीगणनेत स्पष्ट झाले आहे. गतवर्षीच्या प्राणीगणनेत २५७ एवढी असणारी चिंकारांची संख्या या वेळी २७४ इतकी झाल्याची माहिती मयूरेश्वर अभयारण्याचे वनपरिक्षेत्र अधिकारी आर. आर. नागोसे यांनी दिली. या प्राणीगणनेत दुर्मिळ गेकुलिपर्ड जातीची पाल आढळून आली.
बारामती तालुक्यातील काही भाग अवर्षणप्रवण असला तरी या भागात गवताची मैदाने आहेत. ही गवताची मैदानेच चिंकारा हरणांसाठी नैसर्गिक अधिवासाची ठिकाणे आहेत. त्यामुळे तालुक्यात मयूरेश्वर अभयारण्याची निर्मिती करण्यात आली आहे. त्याचबरोबर बारामती शहरानजीकच्या एमआयडीसी परिसरात तांदुळवाडी गावच्या हद्दीतही दोन वर्षांपूर्वी चिंकारा वनउद्यान व सावळ गावच्या हद्दीत पक्षीनिरीक्षण केंद्र सुरू करण्यात आले आहे. चिंकारा उद्यानामध्ये चिंकारा जातीच्या हरणांची संख्या वाढविण्यावर भर देण्यात येत आहे. त्याचबरोबर या उद्यानात औषधी वनस्पतींची लागवड करण्यात आली आहे. यामध्ये आवळा, कांचन, बेहडा, हिरडा, फणस, कोकम, करवंद, कण्हेर आदी विविध झाडांची लागवड करण्यात आली आहे. मयूरेश्वर अभयारण्यात झालेल्या प्राणीगणनेत कुतवळवाडी दर्गा, बोअरवेल हातपंप, टॉवरशेजारी, सिमेंट टँक, नवीन वॉटर होल, झिरो पॉर्इंट, नवीन हापसा ६५ मिरे, निसर्ग परिचय केंद्र अशा आठ ठिकाणच्या पाणवठ्यांवर वनविभागाच्या ६ अधिकारी-कर्मचाऱ्यांसह हंगामी वनमजुरांच्या मदतीने ही प्राणीगणना शनिवारी (दि. २१) बुद्ध पौर्णिमेदिवशी करण्यात आली. या प्रगणनेत १५ वन्यप्रेमींनी सहभाग घेतला होता. या प्रगणनेमध्ये २७४ चिंकारांची नोंद करण्यात आली आहे. यामध्ये १३२ माद्या, ११० नर, तर ३२ पाडसांचा समावेश आहे.