अलिबागमध्ये अल्पवयीन मुलीवर अत्याचार करून खून

तालुक्यातील पोयनाड परिसरातील श्रीगाण आदिवासी वाडीतील एका अल्पवयीन मुलीवर अत्याचार करून तिचा निर्घृण खून करण्यात आल्याची घटना

अलिबाग : तालुक्यातील पोयनाड परिसरातील श्रीगाण आदिवासी वाडीतील एका अल्पवयीन मुलीवर अत्याचार करून तिचा निर्घृण खून करण्यात आल्याची घटना बुधवारी घडली. रायगडच्या पोलिसांनी २४ तासांच्या आत आरोपीला गजाआड केले.पोयनाड येथील श्रीगाण आदिवासीवाडीवर ही अल्पवयीन मुलगी राहत होती. बुधवारी रात्री साडेअकराच्या सुमारास गावातील लहान मुलाच्या पाचवीचा कार्यक्रम आटोपून ती घरी जात असताना आरोपीने त्या मुलीला वाटेत गाठले. अंधाराचा फायदा घेत, त्याने त्या मुलीला रस्त्याशेजारी असणाऱ्या मोकळ््या मैदानात नेले व तिच्यावर अत्याचार केला. पीडित मुलगी प्रतिकार करीत असल्याने, त्याने तिला टोकदार दगडाने मारले. त्यामध्ये ती गंभीर जखमी होऊन मरण पावली. आरोपीने तेथून पळ काढला. या घटनेची फिर्याद दाखल होताच, पोलिसांनी घटनेचे गांभीर्य ओळखून तातडीने तपास सुरू केला. ही मुलगी ज्या आदिवासी वाडीवर राहात होती, त्याच आदिवासी वाडीवर आरोपी राहात होता. पोलिसांनी मिळविलेल्या माहितीच्या आधारे आरोपीला गुरुवारी संध्याकाळी पावणेपाच वाजण्याच्या दरम्यान, म्हणजेच चोवीस तासांच्या आत अटक केली. पोलिसांनी त्याच्याकडे चौकशी केली असता, आरोपीने पीडित मुलीवर अत्याचार करून तिला ठार मारल्याचे सांगितले, अशी माहिती पोलिसांनी दिली. आरोपीला शुक्रवारी न्यायालयात हजर करण्यात येणार असल्याचेही पोलिसांनी स्पष्ट केले. (प्रतिनिधी)