"राहुल गांधी हे परकीय मानसिकतेलाच धार्जिणे आहेत", मुख्यमंत्री एकनाथ शिंदे यांची टीका
By ऑनलाइन लोकमत | Published: September 11, 2024 02:55 PM2024-09-11T14:55:54+5:302024-09-11T15:06:44+5:30
Eknath Shinde : आरक्षणाला धक्का लावण्याचा कोणताही प्रयत्न आम्ही हाणून पाडू, असे म्हणत एकनाथ शिंदे यांनी राहुल गांधी यांच्यावर निशाणा साधला आहे.
!["Rahul Gandhi is the bearer of a foreign mentality", criticized Chief Minister Eknath Shinde | "राहुल गांधी हे परकीय मानसिकतेलाच धार्जिणे आहेत", मुख्यमंत्री एकनाथ शिंदे यांची टीका "Rahul Gandhi is the bearer of a foreign mentality", criticized Chief Minister Eknath Shinde | "राहुल गांधी हे परकीय मानसिकतेलाच धार्जिणे आहेत", मुख्यमंत्री एकनाथ शिंदे यांची टीका](https://d3pc1xvrcw35tl.cloudfront.net/images/420x315/rahul-gandhi-eknath-shinde-1_2024091300605.jpeg)
"राहुल गांधी हे परकीय मानसिकतेलाच धार्जिणे आहेत", मुख्यमंत्री एकनाथ शिंदे यांची टीका
मुंबई : लोकसभा विरोधी पक्षनेते व काँग्रेसचे खासदार राहुल गांधी सध्या अमेरिका दौऱ्यावर आहेत. यादरम्यान राहुल गांधींनी केलेल्या आरक्षणाच्या वक्तव्यावरुन राजकीय खळबळ उडाली आहे. त्यांनी केलेल्या वक्तव्याचे पडसाद भारताच्या राजकारणात उमटले आहेत. दरम्यान, राहुल गांधी यांच्या वक्तव्यावर राज्याचे मुख्यमंत्री एकनाथ शिंदे यांनी प्रतिक्रिया दिली आहे. आरक्षण संपवण्याचा मनसुबा राहुल गांधी यांनी अमेरिकेत व्यक्त केला असून आरक्षणाला धक्का लावण्याचा कोणताही प्रयत्न आम्ही हाणून पाडू, असे म्हणत एकनाथ शिंदे यांनी राहुल गांधी यांच्यावर निशाणा साधला आहे.
यासंदर्भात एकनाथ शिंदे यांनी ट्विट केले आहे. ते म्हणाले, विदेशात जाऊन सातत्याने भारताची येथील नागरिकांची बदनामी करण्याचा उद्योग विरोधी पक्षनेते, लोकप्रतिनिधी राहुल गांधी करतात. परदेशात जाऊन मनाला येईल ते बरळणे, बेछूट आरोप करणे लोकप्रतिनिधीला शोभत नाही. मात्र बोलताना त्यांनी काँग्रेसचा आरक्षणविरोधी खरा चेहरा उघड केला. आरक्षण संपवण्याचा मनसुबा काँग्रेसचे नेते राहुल गांधी यांनी अमेरिकेत व्यक्त केला आहे. आरक्षण संपवण्याची भाषा करणारे राहुल गांधी यांचे हे वक्तव्य अत्यंत दुर्दैवी आहे.
शिवसेना व महायुतीतील सहकारी पक्ष आम्ही आरक्षणाच्या बाजूने आहोत आणि आरक्षण संपवू देणार नाही, याची ग्वाही पुन्हा या निमित्ताने देत आहोत. आरक्षणाला धक्का लावण्याचा कोणताही प्रयत्न आम्ही हाणून पाडू. आपला भारत देश ही 'फेअर प्लेस' नाही, असे परदेशात जाऊन तिथल्या विद्यार्थ्यांसमोर बोलणं हे भारतातील नागरिकांसाठी अत्यंत अवमानकारक आहे. राहुल गांधी हे परकीय मानसिकतेलाच धार्जिणे आहेत, हे या निमित्ताने सिद्ध होते, असे एकनाथ शिंदे यांनी म्हटले आहे.
याचबरोबर, अनेक सर्वसामान्य भारतीय विद्यार्थ्यांनी जागतिक पातळीवर आपल्या बुद्धितेजाने लोकांची मने जिंकली आहेत. स्वामी विवेकानंदांपासून ते आजच्या आयटी क्षेत्रातील बुद्धिमंत विद्यार्थ्यांपर्यंत अनेकांनी अमेरिकेत भारताचा ध्वज उंचावला आहे. त्या सगळ्यांचा अवमान राहुल गांधी यांनी केला आहे. देशाचा, आमच्या अस्मितांचा आणि नागरिकांचा अपमान आम्ही कधीही सहन करणार नाही आणि मान्यही होणार नाही. राहुल गांधी यांच्या वक्तव्याचा मी निषेध करतो, असेही एकनाथ शिंदे यांनी ट्विटद्वारे म्हटले आहे.
विदेशात जाऊन सातत्याने भारताची येथील नागरिकांची बदनामी करण्याचा उद्योग विरोधी पक्षनेते, लोकप्रतिनिधी राहुल गांधी करतात. परदेशात जाऊन मनाला येईल ते बरळणे, बेछूट आरोप करणे लोकप्रतिनिधीला शोभत नाही. मात्र बोलताना त्यांनी काँग्रेसचा आरक्षणविरोधी खरा चेहरा उघड केला.
— Eknath Shinde - एकनाथ शिंदे (@mieknathshinde) September 11, 2024
आरक्षण संपवण्याचा…
राहुल गांधी हे आरक्षणाच्या विरोधात -फडणवीस
राहुल गांधीचा खरा चेहरा समोर आला आहे. राहुल गांधी हे आरक्षणाच्या विरोधात आहेत. त्यांचं वक्तव्य निंदनीय आहे, असे म्हणत राज्याचे उपमुख्यमंत्री देवेंद्र फडणवीस यांनीही आरक्षणाच्या वक्तव्यावरुन राहुल गांधींवर निशाणा साधला आहे.
काय म्हणाले होते राहुल गांधी?
दरम्यान, जातिनिहाय जनगणना आणि आरक्षण या दोन मुद्द्यांवरून काँग्रेसचे नेते आणि लोकसभेतील विरोधी पक्षनेते राहुल गांधी हे मागच्या काही दिवसांपासून कमालीचे आक्रमक आहेत. दरम्यान, सध्या अमेरिकेच्या दौऱ्यावर असलेल्या राहुल गांधी यांनी भारतातील आरक्षण कधीपर्यंत सुरू राहणार? या एका विद्यार्थ्याने विचारलेल्या प्रश्नाला उत्तर देताना मोठं विधान केलं आहे. जेव्हा भारतात आरक्षणाच्या दृष्टीने समानता असेल, तेव्हाच काँग्रेस पक्ष देशामधील आरक्षण संपुष्टात आणण्याबाबत विचार करेल. सध्यातरी अशी स्थिती नाही, असे राहुल गांधी यांनी सांगितले.