सलमानने मद्य घेतल्याचे पाहिले नाही; वेटरने दिली साक्ष

वांद्रे येथे भरधाव गाडी चालवून चौघांना चिरडणारा अभिनेता सलमान खान हा या घटनेआधी एका प्रसिद्ध बारमध्ये होता

मुंबई : वांद्रे येथे भरधाव गाडी चालवून चौघांना चिरडणारा अभिनेता सलमान खान हा या घटनेआधी तेथील एका प्रसिद्ध हॉटेलमधील बारमध्ये होता, अशी साक्ष सोमवारी एका साक्षीदाराने सत्र न्यायालयात दिली़ हा साक्षीदार वांद्रे येथील जे़ डब्ल्यू़ मॅरीओट या हॉटेलमधील बारमध्ये वेटर असून, मोल्ये बग असे त्याचे नाव आहे़ तो म्हणाला, सलमान त्याच्या मित्रांसोबत त्या दिवशी बारमध्ये आला होता़ मी त्यांना ड्रींकही दिली़ मात्र बारमध्ये मंद प्रकाश असल्याने सलमानने मद्यपान केले की नाही हे सांगता येणार नाही़ सत्र न्यायाधीश डी़डब्ल्यू़ देशपांडे यांच्यासमोर ही साक्ष नोंदवण्यात आली़ त्याचवेळी पोलीस हवालदार लक्ष्मण मोरे यांचीदेखील साक्ष नोंदवण्यात आली़ मोरे हे सलमानचा भाऊ सोहेल खान याचे सुरक्षारक्षक होते़ ते म्हणाले, घटनेच्या दिवशी मी सलमानच्या घराजवळच सुरक्षेसाठी होतो़ त्या रात्री सोहेल व सलमान दोघेही घरात नव्हते़ सोहेल घरी लवकर परतला़ पण सलमान आला नव्हता़ काही वेळाने सलमानच्या गाडीला अपघात झाल्याचे आम्हाला कळाले व आम्ही तत्काळ घटनास्थळी पोहोचलो़ तेव्हा तेथे सलमान नव्हता़ या सुनावणीसाठी सलमान न्यायालयात हजर होता़ राखाडी रंगाचा शर्ट व जिन्समधील सलमान सोमवारी थोडासा तणावमुक्त दिसत होता़ त्याला बघण्यासाठी न्यायालयात गर्दी झाल्याने सलमानला नेमकी साक्ष काय सुरू आहे हेदेखील दिसत नव्हते़ अखेर साक्षीदाराला बघण्यासाठी तो जागेवर उठून उभा राहिला़ साक्षीदार बगने सलमानला न्यायालयात ओळखले़ भरधाव गाडी चालवत सलमानने चौघांना चिरडले़ त्यातील एकाचा मृत्यू झाला़ या प्रकरणी सलमानविरुद्ध वांद्रे महानगर दंडाधिकारी न्यायालयात भरधाव व निष्काळजीपणे गाडी चालवण्याचा खटला सुरू होता़ गेल्या वर्षी न्यायालयाने सलमानवर सदोष मनुष्यवधाचा खटला चालवण्यास परवानगी दिली़ या गुन्ह्यासाठी १० वर्षांपर्यंतच्या शिक्षेची तरतूद असल्याने हा खटला सत्र न्यायालयात वर्ग करण्यात आला़ (प्रतिनिधी)