ऑनलाइन लोकमत
धाड, दि. १२ - सतत मारहाण करुन अपमान करत हीन दर्जाची वागणूक देत असल्याने वडिलांनी विषारी औषध प्राशन करुन आपली जीवनयात्रा संपवली. वडिलांच्या मृत्युस आपली आईच कारणीभूत असल्याची फिर्याद मुलाने दिल्यामुळे आईवर शनिवारी धाड पोलिस ठाण्यात गुन्हा दाखल करण्यात आला.
याप्रकरणी धाड पोलिसांनी आरोपी महिलेस अटक केली आहे. सदर घटना धाड पोलीस ठाण्यांतर्गत येणा-या ग्राम मढ येथे घडली. धाडपासून साधारण २० कि.मी. अंतरावर असलेल्या ग्राम मढ या गावाचे रहिवाशी दिनकर गव्हाणे यांचे शेत हे जाळीचा देव शिवारात असून १८ ऑक्टोबर रोजी त्यांचा मुलगा पवन गव्हाणे याने वडिल हरवल्याची फिर्याद पोलिसात दिली होती.
दरम्यान, १९ ऑक्टोबर रोजी दिनकर गव्हाणे यांचे प्रेत त्यांचे शेतालगत डोंगरात आढळून आले. पोलिसांनी पंचनामा करुन आकस्मिक मृत्यूची नोंद केली. दिनकर गव्हाणे हे दैनंदिन बक-या चारुन मजुरी करीत होते. तेबुधनेश्वराच्या मंदीरावर राहत पुजा-अर्चा करीत होते. परंतु, त्यांना घरातत्यांची पत्नी विमलबाई सतत अपमानास्पद वागणूक देत मारहाण करीत होती.
हा त्रास सहन न झाल्याने दिनकर गव्हाणे यांनी विषारी औषधी प्राशन करुन आपली जीवनयात्रा संपवली असल्याची माहिती त्यांचा मुलगा पवन दिनकर गव्हाणे यांनी पोलिसांना दिली. याबाबत पवन याने फिर्याद दिली वरुन धाड पोलिसांनी आरोपी विमलबाई गव्हाणे हीला अटक करुन कलम ३०६ प्रमाणे गुन्हा दाखल केला. आरोपीस न्यायालयासमोर हजर केले असता न्यायालयाने आरोपीस न्यायालयीन कोठडीचे आदेश दिले.