ठाणेकरांना मानाचा मुजरा - उद्धव ठाकरे

ठाणेकरांना वंदन करण्यासाठी, नतमस्तक होण्यासाठी मी आज आलो आहे

ठाणे : ठाणेकरांना वंदन करण्यासाठी, नतमस्तक होण्यासाठी मी आज आलो आहे. शिवसैनिकांनाही मी मानाचा मुजरा करतो. आज शिवसैनिक म्हणून माझ्या भावना दाटून आल्या असून येत्या काही दिवसांत ठाण्यात विजय संकल्प मेळावा घेऊन ठाणेकरांपुढे नतमस्तक होणार असल्याचे प्रतिपादन शिवसेनेचे पक्षप्रमुख उद्धव ठाकरे यांनी केले.ठाण्याच्या महापौर आणि उपमहापौरपदाच्या निवडणुकीच्या निमित्ताने ते सोमवारी ठाण्यात आले होते. महापौरपदाची निवडणूक झाल्यानंतर ते पत्रकारांशी बोलत होते. या वेळी त्यांनी आपल्या भावना व्यक्त करताना ठाणेकरांचे आभार तर मानलेच. शिवाय, ज्या विरोधकांनी आपले उमेदवारी अर्ज भरल्यानंतर माघार घेतली, त्या सर्व विरोधकांचेही मी आभार मानतो, असेही ते या वेळी म्हणाले. भाजपालाही आपण विरोधक मानता का, असा सवाल त्यांना केला असता, सुरुवातीला त्यांनी अर्ज भरला आहे का, याची कल्पना नसल्याचे सांगितले. परंतु, अर्ज भरल्याचे त्यांना सांगितले असता मी सर्व विरोधकांचे आभार मानतो, असे सांगून भाजपालाही विरोधी बाकावर बसवण्याचा प्रयत्न त्यांनी केला. आम्ही आमचा निर्णय घेतला असून आता त्यांचा निर्णय त्यांनी घ्यायचा आहे, असेही त्यांनी या वेळी सांगितले. (प्रतिनिधी)