गडचिरोली : भामरागड उपविभागातील कोपर्शी व पुलनार जंगल परिसरात विशेष अभियान पथक बुधवारी नक्षलविरोधी अभियान राबवित असताना नक्षल्यांसमवेत उडालेल्या चकमकीत सीआरपीएफचा एक जवान व दोन पोलीस किरकोळ जखमी झाले.सीआरपीएफ ३७ बटालियनचे टी. गुनिया आणि पोलीस दलाचे गिरीधर तुलावी व विजयसिंग ठाकूर अशी जखमींची नावे आहेत. नक्षलविरोधी अभियान राबविणाऱ्या पथकावर मंगळवारी सायंकाळी पाचच्या सुमारास नक्षल्यांनी गोळीबार सुरू केला. तेव्हा पोलिसांनी देखील प्रत्युत्तरादाखल नक्षल्यांच्या दिशेने गोळीबार केला. पोलिसांचा वाढता दबाव पाहून नक्षलवादी आपल्याजवळील हत्यारे व साहित्य तेथेच टाकून जंगलाचा फायदा घेत पळून गेले. जखमी तिन्ही जवानांना छत्तीसगड राज्याच्या रायपूर येथील रुग्णालयात दाखल करण्यात आले. (शहर प्रतिनिधी)
नक्षलींसमवेतच्या चकमकीत तीन जवान जखमी
By लोकमत न्यूज नेटवर्क | Published: May 04, 2017 4:00 AM