छेडछाडीतून युवकाचा खून

गेवराई(बीड) : तालुक्यातील खांडवी येथे मुलीच्या छेडछाडीतून दिलीप रघुनाथ शेजूळ (२०) या युवकाला शनिवारी दुपारी लाठ्या- काठ्याने मारहाण करण्यात आली. उपचारादरम्यान रात्री उशिरा त्याचा मृत्यू झाला. या घटनेने तालुक्यात एकच खळबळ उडाली आहे. दरम्यान, तिघांविरुद्ध फिर्याद दाखल झाली असून पोलिसांनी खांडवीत बंदोबस्त वाढविला आहे. सतीश ऊर्फ राजाभाऊ बाबासाहेब झिंगरे, ऋषिकेश महादेव झिंगरे, राहुल सुदाम झिंगरे (तिघे रा. खांडवी) यांनी शनिवारी दुपारी घरात घुसून दिलीपला छेडछाडीचा जाब विचारला. दिलीप व या मुलीचे घर आजूबाजूला आहे. ते आपसात नातेवाईक आहेत. ‘माझ्या बहिणीचा हात का धरला होतास? तू मस्तीस आला आहेस का?’ असे म्हणत त्यांनी लोखंडी गज, काठी व लाथा -बुक्क्यांनी त्याला बेदम मारहाण केली. या मारहाणीत गंभीर जखमी झालेल्या दिलीपला काही व्यक्तींनी गेवराई उपजिल्हा रुग्णालयात दाखल केले. प्रकृती आणखी खालावल्याने त्याला जिल्हा रुग्णालयात हलविण्यात आले. रात्री ११ वाजेच्या सुमारास त्याचा मृत्यू झाला. या प्रकरणी आसराजी एकनाथ शेजूळ यांच्या फिर्यादीवरून तिघांविरुद्ध गेवराई ठाण्यात गुन्हा दाखल करण्यात आला आहे़ तिन्ही आरोपी फरार असून निरीक्षक सुरेंद्र गंधम तपास करीत आहेत़ खांडवीत फौजफाटा तैनात या घटनेनंतर खांडवीत पोलिसांचा फौजफाटा तैनात करण्यात आला आहे. रविवारी दिवसभर गावात फक्त पोलीसच दिसत होते. दिलीपच्या पार्थिवावर सकाळी अकरा वाजता अंत्यसंस्कार करण्यात आले. यावेळी गावात तणाव होता.