लोकमत न्यूज नेटवर्क
नागपूर : १२ वर्षाच्या बालकाने गळफास घेऊन आत्महत्या केल्याची घटना बुधवारी सकाळी ११.३० वाजता नंदनवनच्या शिवणकर नगरात घडली. यामुळे परिसरात हळहळ व्यक्त करण्यात येत आहे. (12-year-old boy strangled to death; What could have caused this?)
अजय सुधीर जांभूळकर (१२) असे मृत बालकाचे नाव आहे. अजय हसनबागच्या आदर्श हायस्कूलमध्ये आठवीला शिकत होता. कुटुंबात आई-वडील आणि लहान बहीण आहे. आईवडील मजुरी करतात. ते बुधवारी सकाळीच कामावर निघून गेले होते. अजय आणि त्याची लहान बहीण दोघेच घरी होते. सकाळी ११.३० वाजता लहान बहीण खेळण्यासाठी बाहेर निघून गेली. बहीण बाहेर जाताच अजयने खिडकीच्या सळाखीला ओढणी बांधून फाशी घेतली.
१५ मिनिटानंतर परिसरातील एका व्यक्तीची नजर अजयवर गेली. त्यानंतर घटनेची माहिती समजली. शेजाऱ्यांनी अजयच्या आईवडिलांना सूचना दिली. नंदनवन पोलिसही घटनास्थळी पोहोचले. पोलिसांनी अजयचे आईवडील आणि शेजाऱ्यांना घटनेबाबत विचारणा केली. मात्र आत्महत्येचे कारण कोणीच सांगू शकले नाही.
एकुलता एक मुलगा असल्यामुळे जांभूळकर दाम्पत्य अजयवर खूप प्रेम करीत होते. ते कामावर गेले तेव्हा अजय सामान्य होता. लॉकडाऊनमुळे शाळा बंद आहेत. काही दिवसांपूर्वी अजय शाळेतही गेला होता. घटनेच्या काही मिनिटे आधी त्याचे बहिणीसोबत बोलणेही झाले होते. त्यामुळे बहीण जाताच त्याने गळफास घेतल्यामुळे आश्चर्य व्यक्त करण्यात येत आहे. या घटनेमुळे परिसरात शोककळा पसरली आहे. नंदनवन पोलिसांनी अकस्मात मृत्यूची नोंद केली आहे.