अवघ्या चार वर्षांच्या चिमुकलीवर अत्याचार करणाऱ्या नराधमाला ठोठावला २० वर्षे कारावास

Nagpur News केवळ चार वर्षांच्या चिमुकल्या मुलीवर लैंगिक अत्याचार करणाऱ्या नराधम भाडेकरूला शुक्रवारी २० वर्षे सश्रम कारावासाची कमाल शिक्षा सुनावण्यात आली.

नागपूर : केवळ चार वर्षांच्या चिमुकल्या मुलीवर लैंगिक अत्याचार करणाऱ्या नराधम भाडेकरूला शुक्रवारी २० वर्षे सश्रम कारावासाची कमाल शिक्षा सुनावण्यात आली. विशेष सत्र न्यायालयाचे न्या.ओ.पी. जयस्वाल यांनी हा निर्णय दिला. ही संतापजनक घटना पारडी येथील आहे.

अनिरुद्ध तीर्थसिंग हनवत (२२) असे आरोपीचे नाव असून, तो मध्य प्रदेशातील मूळ रहिवासी आहे. पीडित मुलीचे दोन माळ्याचे घर आहे. वरच्या माळ्यावरील दोन खोल्या अयोध्याप्रसाद बिसेनला भाड्याने देण्यात आल्या होत्या. त्यांच्यासोबत हनवतही राहत होता. तो बिसेनच्या मावशीचा मुलगा आहे. बिसेनला दीड वर्षाचा मुलगा होता. त्यामुळे पीडित मुलगी त्या मुलासोबत खेळण्यासाठी बिसेनच्या घरी जात होती. २ जानेवारी, २०२० रोजी सायंकाळी ५ च्या सुमारास पीडित मुलगी नेहमीप्रमाणे बिसेनच्या घरी गेली. दरम्यान, आरोपी हनवतने तिच्यावर लैंगिक अत्याचार केला. परिणामी, मुलगी घाबरून आईकडे धावत गेली व तिने आपबिती सांगितली. त्यानंतर, आरोपीविरुद्ध पोलिस ठाण्यात तक्रार नोंदविण्यात आली. न्यायालयात सरकारच्या वतीने ॲड.रश्मी खापर्डे यांनी कामकाज पाहिले. त्यांनी साक्षीदारांचे जबाबासह विविध पुराव्यांच्या आधारावर आरोपीविरुद्धचा गुन्हा सिद्ध केला.