नागपूर : गावाला गेलेल्या एका सराफा व्यापाऱ्याकडे चोरट्यांनी घरफोडी करत १२ लाखांचे दागिने व रोख लंपास केले. वाठोडा पोलीस ठाण्याच्या हद्दीत ही घटना घडली.
सतिश गुणवंत येरपुडे (४७, शैलेश नगर, कोहीनूर लॉनजवळ) हे सराफा व्यापारी ते इतवारीतील सराफा ओळीत कारागीर म्हणूनदेखील काम करतात. तसेच राहत्या घरी त्यांचे ज्वेलरीचे दुकान आहे. अनेकदा ते इतवारीतील दागिने आपल्या दुकानात आणत असतात. ९ सप्टेंबर रोजी ते कुटुंबियांसह यवतमाळ येथे नातेवाईकांकडे गेले होते. त्याअगोदर त्यांनी इतवारीतून बरेच दागिने घरी आणून ठेवले होते. घरी कुणीच नसल्याची संधी साधत अज्ञात चोरट्याने अंगणातील भिंतीवरून उडी टाकत आत प्रवेश केला.
चोरट्याने मुख्य दरवाजाचे कुलूप तोडले व बेडरूममधील कपाटातील लॉकरमधून सोन्याच्या डोरल्यांचे १५ जोड, गळ्यातील १५ चेन, सोन्याच्या बारीचे २० नग, सोन्याचे २० लॉकेट, अंगठ्या, इतर दागिने असे एकूण ३७ तोळे सोने व रोख ७० हजार रुपये असा एकूण १२.०८ लाखांचा मुद्देमाल लंपास केला. मंगळवारी सकाळी येरपुडे परतल्यावर हा प्रकार समोर आला. त्यांच्या तक्रारीवरून वाठोडा पोलीस ठाण्यात अज्ञात आरोपीविरोधात गुन्हा नोंदविण्यात आला आहे.