कार उलटली, पोलिसाचा मृत्यू

शेगाव येथून दर्शन घेऊन परत येणाऱ्या पोलीस दलातील मित्रांच्या कारला अपघात होऊन एका पोलीस शिपायाचा मृत्यू झाला.

धामणाजवळ अपघात : पाच जण जखमीलोकमत न्यूज नेटवर्कधामणा : शेगाव येथून दर्शन घेऊन परत येणाऱ्या पोलीस दलातील मित्रांच्या कारला अपघात होऊन एका पोलीस शिपायाचा मृत्यू झाला. हा अपघात हिंगणा पोलीस ठाण्याच्या हद्दीतील धामणा शिवारात मध्यरात्रीच्या सुमारास झाला. या अपघातात दोन पोलिसांसह आणखी तीन असे पाच जण जखमी झाले. मनीष विश्वनाथ कडवे (२९, रा. सिरसपेठ, नागपूर) असे मृताचे नाव असून, ते सोनेगाव पोलीस ठाण्यात पोलीस शिपाई म्हणून कार्यरत होते. पोलीस शिपाई रोशन शंकराव निंबर्ते (३०, रा. सोमवारी क्वॉर्टर, नागपूर-नेमणूक नंदनवन पोलीस स्टेशन), पंकज संपतराव मसराम (२८, रघुजीनगर, नागपूर-नेमणूक कोतवाली पोलीस स्टेशन) यांच्यासह कारचालक सूरज पराते (२८, रा. नागपूर) शुभम नरेंद्र हरडे (२४, रा. न्यू नंदनवन ले-आऊट, नागपूर) तसेच एकाचा जखमींमध्ये समावेश आहे. नागपुरातील वेगवेगळ्या पोलीस ठाण्यात कर्तव्यावर असलेले पाचही पोलीस मित्र शेगाव येथे एमएच-३१/डीके-५२०० क्रमांकाच्या स्विफ्ट डिझायर कारने गेले होते. दर्शन घेऊन तेथून परत येत असताना मध्यरात्री १२.३० वाजताच्या सुमारास चालकाचे वाहनावरील नियंत्रण सुटले आणि कार रस्त्याच्या कडेला जाऊन उलटली. त्यात मनीष कडवे यांचा घटनास्थळीच मृत्यू झाला तर कारमध्ये बसलेले अन्य पाच जण जखमी झाले. अपघाताची माहिती मिळताच घटनास्थळी दाखल झालेल्या नागरिकांच्या मदतीने जखमींना खासगी रुग्णालयात हलविले. याबाबत हिंगणा पोलिसांनी कारचालकाविरुद्ध भादंविच्या कलम २७९, ३०४ (अ), ३३७, ३३८ सहकलम १८४ मोटर वाहन कायद्यान्वये गुन्हा नोंदविला. तपास सहायक पोलीस उपनिरीक्षक तिवारी, हेड कॉन्स्टेबल राजू भुक्ते, सोमेश्वर वर्धे करीत आहेत. राज्यस्तरीय धावपटू मनीष हा राज्यस्तरीय धावपटू होता. आंतरराष्ट्रीय धावपटू रोहिणी आणि मोनिका राऊत या मनीषच्या घराशेजारीच राहतात. त्यांनी सोबतच सराव करण्यास सुरुवात केली होती. प्रशिक्षक एस. जे. अ‍ॅन्थोनी यांच्या मार्गदर्शनाखाली मनीषने अनेक राज्यस्तरीय स्पर्धा गाजविल्या आहेत. आई-वडिलांना अर्धांगवायूमनीषच्या परिवारात वडील विश्वनाथ आई बेबी व लहान भाऊ निखिल आहे. आई गेल्या पंधरा वर्षांपासून अर्धांगवायूमुळे खाटेवर आहे. तर वडिलांनाही तीन वर्षांपूर्वी संधीवाताचा आजार जडल्याने तेसुद्धा खाटेवरच आहे. त्यांचा सांभाळ करण्याची जबाबदारी मनीष व निखिल यांच्याकडे होती. घरातील कामाचा ताण वाढल्याने मनीषच्या लग्नाचा विचार सुरू होता. त्यासंबंधाने आप्तस्वकीयांमध्ये बोलचालही सुरू होती. सुदृढ शरीरयष्टीचा मनीष २००८ मध्ये पोलीस विभागात रुजू झाला होता. पोलीस मुख्यालयानंतर महाल येथील संघ मुख्यालयात त्याने दोन वर्षे नोकरी केली. त्यानंतर गेल्या तीन वर्षांपासून तो सोनेगाव ठाण्यात होता. गुन्हे प्रकटीकरण शाखेमध्ये कार्यरत असलेल्या मनीषचा स्वभाव मनमिळावू आणि सेवाभावी असल्यामुळे त्याची केवळ पोलीस विभागच नव्हे तर अन्य विभागात तसेच सामाजिक क्षेत्रातही मोठी ओळख होती. गुन्हेगारी वर्तुळातील अनेक गुन्हेगारांच्या हालचालीवर त्याची नजर होती. त्यामुळे अवैध धंदेवाले, गुन्हेगार मनीषला वचकून राहायचे. त्याच्या अपघाती मृत्यूच्या वृत्ताने पोलीस विभागासह मित्रपरिवारावरही तीव्र शोककळा पसरली. सामाजिक क्षेत्रातील अनेक मान्यवर त्याच्या अंत्यसंस्काराला उपस्थित होते. परिवारातील कर्ता माणूस असलेला मनीष गेल्याने कडवे कुटुंबावर दु:खाची कुऱ्हाड कोसळली आहे.