Vidhan Parishad Election : चंद्रशेखर बावनकुळेंचा उमेदवारी अर्ज दाखल; छोटू भोयर यांचा काँग्रेसप्रवेश

भाजपचे नागपूर विभागातील उमेदवार व माजी पालकमंत्री चंद्रशेखर बावनकुळे यांनी आज विधानपरिषद निवडणूकीसाठी उमेदवारी अर्ज दाखल केला. दुसरीकडे भाजपचे नगरसेवक छोटू भोयर यांनी पक्षाला रामराम ठोकत काँग्रेसमध्ये प्रवेश केला.

ठळक मुद्देगडकरी, फडणवीस यांच्या उपस्थितीत भाजपचे शक्ती प्रदर्शनजमावबंदीचे भाजप कार्यकर्त्यांकडून उल्लंघनछोटू भोयर यांचा काँग्रेसप्रवेश 

नागपूर : महाराष्ट्र विधान परिषदेच्या नागपूर स्थानिक स्वराज्य संस्था मतदार संघातून भाजप उमेदवार चंद्रशेखर बावनकुळे यांनी केंद्रीय मंत्री नितीन गडकरी, आणि देवेंद्र फडणवीस यांच्या उपस्थितीत उमेदवारी अर्ज दाखल केला. तर, दुसरीकडे भाजपचे नगरसेवक छोटू भोयर यांनी पक्षाला रामराम ठोकत काँग्रेसमध्ये एन्ट्री केली. 

भाजपचे नागपूर विभागातील उमेदवार आणि माजी पालकमंत्री चंद्रशेखर बावनकुळे यांनी आज विधानपरिषद निवडणूकीसाठी अर्ज दाखल केला. यावेळी गडकरी यांनी बावनकुळे यांना शुभेच्छा दिल्या. तत्पूर्वी गडकरींच्या निवासस्थानी कांचन गडकरी यांनी बावनकुळे यांचे औक्षण केले.

आकाशवाणी चौकातून बावनकुळेंसह कार्यकर्त्यांची रॅली निघाली, यात गडकरी, विरोधी पक्षनेते देवेंद्र फडणवीस यांच्या उपस्थितीत भाजपचे शक्ती प्रदर्शन केले. बावनकुळे आप आगे बढो हम तुम्हारे साथ है, च्या घोषणेसह अनेक कार्यकर्त्यांचा जत्था बावनकुळेंसह जिल्हाधिकारी कार्यालयाकडे निघाला. महत्वाचे म्हणजे, अमरावती हिंसाचाराच्या पार्श्वभूमीवर शहरात जमावबंदी लागू केली असताना निर्बंधांना फाटा देत भाजपची रॅली निघाली. 

छोटू भोयर काँग्रेसमध्ये

भाजपचे नगरसेवक छोटू (रविंद्र) भोयर यांनी रविवारी रात्री भाजपकडे आपला राजीनामा सोपवला होता. तर, आज त्यांनी देवदिया काँग्रेस भवन येथे आयोजित कार्यक्रमात काँग्रेसमध्ये प्रवेश केला. छोटू भोयर हे विधान परिषदेच्या नागपूर  स्थानिक स्वराज्य संस्था मतदार संघात काँग्रेसचे उमेदवार होण्याची शक्यता आहे.

दरम्यान, स्थानिक स्वराज्य संस्था मतदार संघासाठी काँग्रेसचे राजेंद्र मुळक यांच नाव चर्चेत होतं. मात्र, पालकमंत्री नितीन राऊत व क्रीडामंत्री सुनील केदार यांच्याकडून त्यांना ग्रीन सिग्नल मिळाला नाही. दुसरीकडे भोयर हे या दोन्ही मंत्र्यांच्या संपर्कात होते. भोयर यांना उमेदवारी दिली, तर भाजपचा नागपूर शहरातील एक मोठा गट फूटू शकतो, असा या दोन्ही मंत्र्यांचा दावा आहे. 

भाजपमध्ये माझा छळ करण्यात आला

गेली ३४ वर्षे भाजपसोबत काम केले. तो पक्ष सोडताना मनात वेदना होत आहेत. मात्र ज्या भाजपला वाढवण्यासाठी दिवस-रात्र काम केले. अनेक नवीन लोकांना पक्षात आणले, त्याच भाजपमध्ये माझा छळ करण्यात आला. मला दाबण्यात आले आणि त्यामुळेच पक्ष सोडण्याचा निर्णय घेतला आहे, असे छोटू भोयर यांनी स्पष्ट केले.