छत्रपती शिवाजी आघाडीने मारली बाजी
रामटेक : रामटेक तालुक्यातील मानापूर ग्रामपंचायतच्या निवडणुकीत काँग्रेस समर्थित आघाडीला मोठा फटका बसला. येथे काँग्रेस समर्थित गटाला एकही जागा जिंकता आली नाही. मानापूर ग्रामपंचायतमध्ये काँग्रेस समर्थित आघाडी, शिवसेना समर्थित छत्रपती शिवाजी आघाडी व भाजपा समर्थित परिवर्तन आघाडी अशी तिरंगी लढत झाली. यामध्ये छत्रपती शिवाजी आघाडीचे सहा उमेदवार विजयी झाले. भाजपा समर्थित परिवर्तन आघाडीचे तीन उमेदवार विजयी झाले. मानापूर ग्रामपंचायतमध्ये विजयी उमेदवारांमध्ये आकाश रामदास चांदेकर, भारती कैलाश आष्टनकर, हंसा यशवंता मानवटकर, भारत विनायक अडकने, राहुल एकनाथ वांढरे, राेशनी राहुल नगरे, संदीप मधुकर सावरकर, पूजा हरिपाल वाहणे, सपना राजकुमार हटवार यांचा समावेश आहे. गावात विजयी उमेदवारांची मिरवणूक काढण्यात आली. रोशन सावरकर, विनोद सावरकर, मनोहर वांढरे यांनी विजयी उमेदवारांचे अभिनंदन केले.