नागपूर : दारूच्या नशेत भरधाव वाहन चालवून दुचाकीला धडक देणाऱ्या आरोपीने नंतर त्या दुचाकी चालकाकडून खंडणी वसूल करण्याचा प्रयत्न केला. मानकापूर पोलीस ठाण्याच्या हद्दीत गुरुवारी सायंकाळी ही घटना घडली.
ललित उर्फ टोनी असे आरोपीचे नाव आहे. मानकापूरच्या पुरुषोत्तम सुपर बाजारजवळ आरोपी टोनी याने गुरुवारी दुपारी ३ च्या सुमारास राहुल सतीश उपाध्याय (वय २७) याच्या दुचाकीला धडक दिली. राहुल आणि त्याचा मित्र अभिषेक ठाकूर यांनी याबाबत जाब विचारला असता आरोपी टोनी याने फोन करून त्याचे साथीदार कपिल वानखेडे, रुमी, दत्ता आणि सौरभ कोहचाडे यांना बोलावून घेतले. तेथे या पाच जणांनी राहुल तसेच अभिषेकला शिवीगाळ करून मारहाण केली. तुमच्या ॲक्टिवामुळे माझ्या वाहनाचे नुकसान झाले, असे सांगून आरोपीने त्यांना पाच हजार रुपये मागितले. ते देत नसल्याचे पाहून राहुलचे वडील रमेश उपाध्याय यांना आरोपींनी शिवीगाळ करून धमकी दिली. घटनास्थळी तणाव वाढल्याची माहिती मिळाल्यानंतर मानकापूर पोलिसांनी तेथे धाव घेतली. तोपर्यंत आरोपी पळून गेले होते. राहुलच्या तक्रारीवरून पोलिसांनी आरोपी ललित उर्फ टोनी, कपिल, रोमी, दत्ता आणि सौरभ या पाच जणांविरुद्ध गुन्हा दाखल केला. त्यांचा शोध घेतला जात आहे.
---