लोकमत न्यूज नेटवर्क
नागपूर : नागपूर शहरात कोरोना संक्रमण वेगाने वाढत आहे. मेडिकल, मेयो व अन्य शासकीय रुग्णालयात रुग्णांची गर्दी वाढली आहे. त्यामुळे रुग्णांची गैरसोय होऊ नये याकरिता शासकीय रुग्णालय तसेच खासगी रुग्णालयातील उपलब्ध रिक्त खाटांची माहिती कोरोना नियंत्रण कक्षातून देण्यात यावी, असे निर्देश महापौर दयाशंकर तिवारी व आयुक्त राधाकृष्णन बी. यांनी दिले.
महापौर, आयुक्त यांच्यासह उपमहापौर मनीषा धावडे यांनी मंगळवारी मनपा मुख्यालयातील श्रद्धेय अटलबिहारी वाजपेयी सिटी ऑपरेशन सेंटर येथील कोरोना नियंत्रण कक्षाला भेट देऊन व्यवस्थेचा आढावा घेतला. नागपूर स्मार्ट अॅण्ड सस्टेनेबल सिटी डेव्हलपमेंट कॉर्पोरेशन लिमिटेडच्या मुख्य कार्यकारी अधिकारी भुवनेश्वरी एस., अतिरिक्त आयुक्त जलज शर्मा, राम जोशी, संजय निपाणे आदी उपस्थित होते.
कोरोनासंदर्भातील रुग्णालयांची माहिती हवी असेल तर ती नागरिकांना दिली जाते. शहरातील कुठल्या रुग्णालयात किती बेड उपलब्ध आहेत, यासह पॉझिटिव्ह असलेल्या रुग्णांनाही फोनद्वारे विचारपूस करण्यात येते. त्यांच्या शंकांचे निरसन करण्यात येते, अशी माहिती संबंधित अधिकाऱ्यांनी दिली. कोरोनाच्या वाढत्या संसर्गामुळे नागरिकांच्या मनात भीती निर्माण झाली आहे. ही भीती घालविण्यासाठी नागरिकांच्या मनातील शंकांचे निरसन नियंत्रण कक्षाच्या माध्यमातून व्हायला हवे. आता या कोरोना नियंत्रण कक्षातून विधानसभा क्षेत्रनिहाय आणि झोननिहाय विचारणा करून त्यानुसार जवळच्या कोविड रुग्णालयात उपलब्ध खाटा तसेच रिक्त खाटांची अद्ययावत माहिती कोरोना केंद्रातून द्यावी, अशी सूचना महापौर व आयुक्तांनी केली.
...
झोन कार्यालयसंपर्क क्रमांक
लक्ष्मीनगर झोन -०७१२-२२४५०५३
धरमपेठ झोन -०७१२-२५६५५८९
हनुमाननगर झोन -०७१२-२७५५५८९
धंतोली झोन -०७१२-२४६५५९९
नेहरूनगर झोन -०७१२-२७०२१२६
गांधीबाग झोन -०७१२-२७३९८३२/२७३९९००
सतरंजीपुरा झोन -०७१२-२९५८२३५ मो.नं. ७०३०५७७६५०
लकडगंज झोन -०७१२-२७३७५९९
आशीनगर झोन-०७१२-२५६५६०५
मंगळवारी झोन -०७१२-२५९९९०५/२५९६९०४
केंद्रीय नियंत्रण कक्ष-०७१२-२५६७०२१/२५५१८६६