पतंगीच्या वादातून तरुणाची हत्या

पतंग उडविताना झालेल्या हुल्लडबाजीत दोन गटात हाणामारी झाली अन् त्याचे पर्यवसान एका तरुणाच्या भीषण हत्येत झाले.

नागपूर : पतंग उडविताना झालेल्या हुल्लडबाजीत दोन गटात हाणामारी झाली अन् त्याचे पर्यवसान एका तरुणाच्या भीषण हत्येत झाले. हल्लेखोरांनी दुसऱ्या एका तरुणालाही गंभीर जखमी केले. शुक्रवारी सकाळी ११ च्या सुमारास सक्करदऱ्यातील आशीर्वादनगरात ही थरारक घटना घडली. यामुळे दिवसभर या भागात तणाव होता.मकरसंक्रांतीच्या निमित्ताने पतंग उडविण्यासाठी जुनी बिडीपेठ येथील चंद्रशेखर ऊर्फ शेखर दामोदर वडसकर (वय ३०), सागर रामदास गायकवाड (वय ३०), शंकर मारबते, उलुंगा आणि पठाण नामक तरुण आज सकाळीच घराबाहेर पडले. त्यांनी सक्करदऱ्यातील आशीर्वादनगर, बजाज बिल्डिंगसमोरच्या मैदानात पतंगबाजी सुरू केली. ‘ओ काट... ओ पार...’ असे सुरू असतानाच हुल्लडबाजीत या तरुणांमधील एक जण चुकून ताजबागमधील काही तरुणांच्या घोळक्यात गेला. तेथे धक्का लागल्यावरून वाद झाला. त्यामुळे दोन्हीकडील तरुणांनी एकमेकांना मारहाण केली. आठ ते दहा आरोपींचा समावेशपतंगीच्या वादातून तरुणाची हत्या नागपूर : घटनेआधी दुसऱ्या गटातील तरुण निघून गेले. अर्ध्या तासातच तीन दुचाक्यांवर आठ ते दहा आरोपी हत्यार घेऊन मैदानाजवळ आले. त्यांनी दुचाक्यांवरूनच शिवीगाळ करीत सागर, शेखर आणि त्याच्या मित्रांकडे धाव घेतली. ते पाहून इतर सर्व पळून गेले. सागर मात्र आरोपींच्या तावडीत सापडला. त्यामुळे त्यांनी सागरला शस्त्राने भोसकणे सुरू केले. ते पाहून शेखर मदतीला धावला. तो हात जोडून आरोपींना सागरला सोडून देण्याची विनंती करीत होता. मात्र, आरोपींनी सागरला मारणे सुरू ठेवतानाच शेखरवर शस्त्राचे सपासप घाव घालून त्यालाही रक्ताच्या थारोळ्यात लोळविले. या थरारक प्रकारामुळे आजूबाजूच्यांनी आरडाओरड केली. काहींनी पोलिसांनाही फोन केले. त्यामुळे आरोपी आपापल्या मोटरसायकलवर पळून गेले. जखमी शेखर आणि सागरला मेडिकलमध्ये दाखल करण्यात आले. तेथे डॉक्टरांनी शेखरला मृत घोषित केले. दिवसाढवळ्या वर्दळीच्या ठिकाणी घडलेल्या या हत्याकांडामुळे परिसरात प्रचंड तणाव निर्माण झाला. सक्करदरा पोलिसांचा ताफा घटनास्थळी पोहचला. वरिष्ठांनीही धाव घेतली. ज्यावेळी ही घटना घडली त्यावेळी मोठ्या संख्येत पतंगबाजांची गळेकापू स्पर्धा सुरू होती. मात्र, अनेकांदेखत ही हत्या होऊनही पोलिसांना आरोपींबाबत माहिती देण्यासाठी कुणी पुढे आले नाही. केवळ तीन ते चार मोटरसायकलवर आठ ते दहा आरोपी होते, एवढेच काही जण सांगत होते.(प्रतिनिधी)मित्राच्या नादात जीव गमावला शेखर हा त्याच्या आईवडीलांना एकुलता एक मुलगा होता. तो विमानतळावर इलेक्ट्रीशियन म्हणून कंत्राटी पद्धतीने काम करीत होता. त्याचे वडील दामोदर वडसकर वीज मंडळाचे निवृत्त कर्मचारी आहे. शेखरचे दीड वर्षांपूर्वीच लग्न झाले. तो सकाळपासून आपल्या घरीच पत्नी शिल्पासह पतंग उडवित होता. मित्रांनी त्याला सोबत चलण्यास जबरदस्ती केली. त्यामुळे पत्नीला तो मांजा आणि पतंग घेऊन येतो, असे सांगून मित्रांसोबत गेला. तासा-दीड तासानंतर त्याची हत्या झाल्याचीच माहिती त्याच्या घरच्यांना कळली. शेखरचे वडील व पत्नी दोघेही बेशुद्ध पडले.