नागपूरच्या पोलीस व्हॅनला अपघात; ६ जखमी

अकोला जिल्ह्यातील वाशिंबा येथे घडला अपघात; सहा पोलीस कर्मचारी जखमी.

बोरगाव मंजू (जि. अकोला) : टँकर चालकाने अचानक ब्रेक लावल्याने पोलीस व्हॅन टँकवर आदळून, सहा पोलीस कर्मचारी जखमी झाल्याची घटना अकोला जिल्ह्यातील वाशिंबा येथे मंगळवारी घडली. एमएच-३१-डी-४७१९ क्रमाकांची राज्य राखीव पोलीस दलाची व्हॅन नागपूर येथून नाशिककडे जात होती. व्हॅनमध्ये २७ पोलीस कर्मचारी होते. अकोलानजिक असलेल्या वाशिंबा येथे एमएचएफपी-५१६१ क्रमांकाच्या गॅस वाहून नेणार्‍या टॅँकरच्या चालकाने अचानक ब्रेक लावल्याने पोलीस व्हॅन टँकरवर आदळली. या अपघातात किरण कडाक, महेंद्र ठोंबरे, जीवन मेश्राम, के.बी. गजभिये, डी.पी. कोवासे, मंगेश देवघडे हे जखमी झाले. जखमींना सर्वोपचार रुग्णालयात भरती करण्यात आले असून, याप्रकरणी गॅस टँकरच्या चालकाविरुद्ध गुन्हा दाखल करण्यात आला.