सफेलकरचा साथीदार कटारियाला न्यायालयाचा दणका
नागपूर : फसवणूक, ठार मारण्याची धमकी, खंडणी इत्यादी गंभीर गुन्ह्यांच्या प्रकरणातील आरोपी जितेंद्र ऊर्फ जितू प्रतापराय कटारिया याचा जामीन अर्ज सत्र न्यायालयाने बुधवारी फेटाळून लावला. कटारिया हा कुख्यात गुन्हेगार रणजित सफेलकरचा साथीदार आहे. ८ एप्रिल २०२१ रोजी जुनी कामठी पोलिसांनी भीलगाव येथील डुम्मन प्रगट यांच्या तक्रारीवरून सफेलकर, कटारिया व इतर आरोपींविरुध्द एफआयआर नोंदवला आहे़ कटारियाला ९ एप्रिल रोजी अटक करण्यात आली आहे़ आरोपींनी संगनमत करून प्रगट यांची मालमत्ता हडप केली़ तसेच, मालमत्ता परत करण्यासाठी त्यांना ५० लाख रुपये खंडणी मागितली व ठार मारण्याची धमकी दिली, अशी पोलीस तक्रार आहे़ सरकारच्या वतीने अ‍ॅड. दीपिका गवळी यांनी कामकाज पाहिले़