नागपूर : बनावट कागदपत्रांच्या आधारे वृद्ध व्यक्तीच्या भूखंडाची विक्री करणाऱ्याच्या विरुद्ध प्रतापनगर पोलिसांनी गुन्हा नोंदवला आहे. आरोपींमध्ये विधित प्रदीप पारसेकर (३६, रा. बजाजनगर), नरेश ज्ञानेश्वर सावरकर (५५, रा. पार्वतीनगर), रूपम बाबूराव मुळक (४४, रा. सुरेंद्रगड) व यांचा एक साथीदार आहे. गोपालनगर निवासी ८५ वर्षीय गजानन दुपारे यांचा भामटी येथील लोकसेवानगरमध्ये भूखंड आहे. आरोपींनी बनावट कागदपत्रांच्या आधारे एक डमी व्यक्ती उभा केला आणि भूखंडाची विक्री केली. प्रकरणाची माहिती होताच दुपारे यांनी प्रतापनगर ठाण्यात तक्रार नोंदवली. दीर्घकाळापासून प्रलंबित असलेल्या या प्रकरणात गुरुवारी फसवणुकीचा गुन्हा नोंदवण्यात आला आहे.
------------------------
टिप्पर-ट्रकमध्ये धडक, क्लिनरचा मृत्यू
नागपूर : ट्रक आणि टिप्परच्या धडकेत क्लिनरचा मृत्यू झाला असून, ट्रक चालक जखमी झाला आहे. ही घटना गुरुवारी रात्री १ वाजता छत्रपती चौकात घडली. मृत नरपेश हिंमत यादव (२४) तर जखमी विक्रम यादव (२४) दोन्ही राहणारे दतिया, मध्य प्रदेशचे आहेत. विक्रम ट्रक चालक तर नरपेश क्लिनर आहे. दोघेही ट्रकमध्ये पाईप घेऊन ग्वाल्हेर येथून विजयवाडाकडे चालले होते. रात्री १ वाजता छत्रपती चौक पार करताना ट्रकची धडक रेतीने भरलेल्या टिप्पर क्रमांक एम.एच. ४०, ए.के. ७२२२ला लागली. धडक लागताच ट्रक जवळच असलेल्या इमारतीच्या गोदामात शिरला. ट्रकचे केबिन पूर्णत: उद्ध्व‌स्त झाले असून, क्लिनर नरपेशचा घटनास्थळीच मृत्यू झाला तर चालक विक्रम जखमी झाला आहे. प्रतापनगर पोलिसांनी टिप्पर चालकाचा ताब्यात घेतले आहे.