उर्दू घरचे तीन प्रेशरगेज चोरीला
शहरातील देगलूर नाका भागातील उर्दू घरचे साहित्य चोरीला जाण्याचा सपाटा सुरुच आहे. २१ ऑगस्ट रोजी इमारतीच्या पाठीमागील बाजूस हौदावर बसविण्यात आलेले दीड हजार रुपये किमतीचे तीन प्रेशरगेज चोरट्याने लांबविले. या प्रकरणात व्यवस्थापक अब्दुल सलीमखान बिसमिल्ला यांच्या तक्रारीवरुन इतवारा ठाण्यात गुन्हा नोंद झाला.
गोकुळनगर भागात डॉक्टरला मारहाण
शहरातील गोकुळनगर भागात प्लॉटवर पाटी लावण्याच्या कारणावरुन झालेल्या वादानंतर डॉक्टरला मारहाण करण्यात आली. डॉ.रामचंद्र बहिरवाड यांच्या मालकीच्या जागेवरील पाटी काढून त्याजागी दुसरी पाटी लावण्यात येत होती. याबाबत बहिरवाड यांनी जाब विचारल्यानंतर आरोपींनी त्यांना मारहाण केली. या प्रकरणात शिवाजीनगर पोलिसांनी गुन्हा नोंदविला.
शेतमजूर वाडीत जुगारावर धाड
हदगांव तालुक्यातील मौजे शेतमजूर वाडी येथे सुरू असलेल्या जुगार अड्डयावर पोलिसांनी धाड मारली. २१ ऑगस्ट रोजी ही कारवाई करण्यात आली. यावेळी पोलिसांनी एक हजार रुपये आणि जुगाराचे साहित्य जप्त केले. या प्रकरणात तामसा ठाण्यात गुन्हा नोंद झाला.
घरासमोरच दारुची अवैध विक्री
बिलोली तालुक्यातील मौजे रामतीर्थ येथे घरासमोरील माेकळ्या जागेतच दारुची अवैध विक्री करण्यात येत होती. पोलिसांनी या ठिकाणाहून दीड हजार रुपयांची देशी दारु जप्त केली असून रामतीर्थ ठाण्यात गुन्हा नोंद झाला आहे.