मनोज शेलार, नंदुरबार: नवापूर-खांडबारा रस्त्यावर वडदे ते खातगावदरम्यान दुचाकीस्वाराला वाचविण्याचा प्रयत्नात पिकअप वाहन उलटल्याने १५ जण जखमी झाले. यापैकी चारजण गंभीर जखमी झाले असून त्यांना जिल्हा रुग्णालयात दाखल करण्यात आले आहे. मिळालेल्या माहितीनुसार, मंगळवारी दुपारी चार वाजेच्या सुमारास गुजरात राज्यातील महुवा येथून मध्य प्रदेश राज्यातील डोहफोड येथे वीटभट्टीवर काम करणाऱ्या मजुरांना घेऊन पिकअप वाहन जात होते.
भरधाव असलेले वाहन दुचाकीचालकाला वाचविण्याच्या प्रयत्नात खातगावनजीक उलटले. त्यात बसलेले १५ मजूर जखमी झाले. जखमींमध्ये सुनील गोकुळ पाटील, गोपीराज चंद्र, कडू पाटील, नीलाबाई गोकुळ पाटील, पिंकी मनू महाजन, मनू चाफा महाजन, रोशन सुकलाल, जणूबाई नरेश जामकर, नरेश समाधान जामकर, समाधान मंगा जामकर यांच्यासह इतरांचा समावेश आहे.
अपघाताची माहिती मिळताच परिसरातील शेतात काम करणारे शेतकरी व मजूर मदतीला धावून आले. रुग्णवाहिकेद्वारे जखमींना खांडबारा व विसरवाडी रुग्णालयात दाखल करण्यात आले. पैकी चौघांना जिल्हा रुग्णालयात दाखल करण्यात आले. घटनास्थळी विसरवाडी पोलिस कर्मचारी दिनेश चित्ते व अमरसिंग कोकणी यांनी धाव घेत मदतकार्य केले. खांडबाराचे सरपंच अविनाश गावित, शब्बीर खाटीक, मनोज चौधरी व बजरंग दलाच्या पदाधिकाऱ्यांनी मदत केली.