मयत महिला जिवंत असल्याचे दाखवून घेतला खोटा अंगठा

लोकमत न्यूज नेटवर्कनंदुरबार : महिला मयत असतांनाही ती जीवंत असल्याचे भासवून तिचा बनावट अंगठा कागदपत्रांवर केल्याची घटना समोर आली आहे. याबाबत तळोदा उपविभागीय कार्यालयातर्फे चार जणांविरुद्ध १२ रोजी गुन्हा दाखल करण्यात आला आहे.सेंधवन, ता.अक्कलकुवा येथील सुमनबाई गुलाबसिंग पाडवी ही महिला मयत झालेल्या असतांनाही ती जीवंत असल्याचे तिच्या कुटूंबियांनी भासविले. शहादा दिवाणी न्यायालयात लागणाऱ्या कागदपत्रांसाठी तिच्या नातेवाईकांनी महिलेचा खोटा अंगठा देखील केला. परंतु ही बाब नंतर उघड झाली.ही कागदपत्रे तळोदा उपविभागीय अधिकारी कार्यालयाकडून गेल्याने तळोदा प्रांताधिकारी कार्यालयातील कर्मचारी राजू महारू गवळी यांनी फिर्याद दिल्याने फत्तेसिंग दित्या पाडवी, अनिल दित्या पाडवी, जांगीबाई हातल्या पाडवी व बारकीबाई दित्या पाडवी सर्व रा.सेंधवन, ता.अक्कलकुवा यांच्याविरुद्ध फसवणुकीचा गुन्हा दाखल करण्यात आला आहे. तपास पोलीस उपनिरिक्षक प्रशांत राठोड करीत आहे.दरम्यान, संशयीतांना लवकरच ताब्यात घेण्यात येणार असल्याचे पोलिसांनी सांगितले.