नंदुरबार :
तालुक्यातील अतिदुर्गम भागातील सिंदुरीचा मोगराबारीपाडा येथे एकाने मध्यरात्रीच्या सुमारास घरातील बकऱ्यांसह आपल्या घराला आग लावून स्वतःही उडी घेत आपली राख रांगोळी करून जीवन संपविल्याची हृदय द्रावक घटना शुक्रवारी मध्यरात्री घडली. गंगाराम खुमा वळवी (३०) असे मयताचे नाव आहे.
अतिदुर्गम भागातील सिंदुरीचा मोगराबारी पाडा येथे वळवी राहतात. रात्री ते एकटेच घरी होते. शुक्रवारी मध्यरात्री घरात असलेल्या पशुधनासह आपल्याच घराला स्वतः पेटवून देत जळत असलेल्या घरात स्वतःने देखील उडी घेऊन आपली जीवन यात्रा संपविली. आजूबाजूच्या लोकांना ही बाब समजल्यावर तेथे त्यांनी धाव घेतली. तोपर्यंत घर बेचिराख झाले होते. या हृदय द्रावक घटनेने सातपुड्यात हळहळ व्यक्त केली जात आहे. मोलगी पोलिसांना ही माहिती मिळताच अधिकाऱ्यांनी घटनास्थळी भेट देऊन पंचनामा केला. घटनेचे नेमके कारण कळू शकलेले नाही. या दुर्दैवी घटनेमुळे या परिसरातील प्रसिद्ध असलेली "बाहा ही राजा" यांची सालावादाप्रमाणे भरणारी यात्रा रद्द करण्यात आली. त्यांचे पारंपारिक पद्धतीने दरवर्षी होणारे पूजन साध्या पद्धतीने करण्यात आले.