नाशिक : वैवाहिक संबंध प्रस्थापित करण्यास शारीरिकदृष्ट्या सक्षम नसल्याचे लपवून ठेवून आर्थिक फायद्यासाठी विवाह करीत विवाहितेचा मानसिक व शारीरिक छळ करण्यासोबतच तिला झोपेच्या गोळ्या तोंडात कोंबून जिवे ठार मारण्याचा प्रयत्न झाल्याचा प्रकार उपनगर परिसरातील शिखरेवाडी भागात घडला आहे. याप्रकरणी पीडितेने उपनगर पोलीस ठाण्यात पतीसह सासरच्या तीन जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पीडितेने पती जय हरसुखलाल चौहान ( ३५,शिखरेवाडी) याच्यासह सासरच्या तीन जणांविरुद्ध याप्रकरणी गुन्हा दाखल करण्यात आला आहे. अवघ्या सहा-सात महिन्यांपूर्वी विवाह झालेल्या पीडितेने याप्रकरणी तक्रार दाखल केली आहे. संशयिताला वेरॉसिकल वेन्स, सिप्लीस आजार असल्याने तो वैवाहिक संबंध प्रस्थापित करण्यास सक्षम नसल्याचे माहिती असूनही, संगनमताने माहिती लपवून ठेवून आर्थिक फसवणुकीसाठी हा विवाह लावण्यात आल्याचा आरोप पीडितेने केला आहे. या बाबत पीडितेने जाब विचारण्याचा प्रयत्न केला असता सासरच्या मंडळीकडून पैशांची मागणी करीत तिचा शारीरिक व मानसिक छळ करण्यात आला. तसेच झोपेच्या गोळ्या तोंडात कोंबून ठार मारण्याचा प्रयत्न केल्याचा आरोपही पीडितेने केला असून, या प्रकरणाचा अधिक तपास पोलीस करीत आहेत.