अपघातात महाविद्यालयीन युवक ठार

देवळा : तालुक्यात भावडबारी घाटाच्या पायथ्याशी हिरो स्कुटीला अज्ञात वाहनाने धडक दिल्यामुळे भऊर ( ता. देवळा ) येथील रोशन दयाराम पवार (१९) हा महाविद्यालयीन विद्यार्थी जागीच ठार झाला. पोलिस सूत्रांनी दिलेल्या माहितीनुसार देवळा शहरापासून दहा किलोमीटर अंतरावर विंचूर प्रकाशा मार्गावर भावड घाटाच्या पायथ्याशी असलेल्या एस.के. डी. इंग्लिश मिडीअम स्कुल जवळ बुधवारी दुपारी १२ वाजेच्या सुमारास हा अपघात घडला. रोशन दयाराम पवार हा देवळा येथून आपल्या हिरो मेस्ट्रो स्कुटीने (क्र . एमएच ४१, आरके ५२१६) नासिक येथे जात असतांना भावड घाटाच्या पायथ्याशी असलेल्या वळण रस्त्यावर अज्ञात वाहनाने धडक दिल्यामुळे चाकाखाली सापडून डोक्याला गंभीर मार लागल्याने जागीच ठार झाला. रोशनला त्वरीत देवळा येथील ग्रामीण रूग्णालयात दाखल केले असता डॉक्टरांनी मृत झाल्याचे घोषित केले. ग्रामीण रु ग्णालयात त्याचे शवविच्छेदन करण्यात आले. रोशनची आई रंजना पवार व वडील दयाराम नारायण पवार हे दोघेही अनुक्र मे मंगरूळ, व भाटगाव ( ता. चांदवड ) येथे प्राथमिक शिक्षक आहेत.रोशनने नुकतीच बारावीची परीक्षा दिली असून पुढील एन्ट्स परीक्षांची तयारी करण्याच्या उद्देशाने तो क्लास लावण्यासाठी नासिक येथे जात होता. एक हुषार विद्यार्थी म्हणून त्याचे नाव होते. त्याच्या पश्चात आई, वडील व भाऊ असा परिवार आहे. त्याच्या अकाली मृत्युमुळे सर्वत्र हळहळ व्यक्त करण्यात येत आहे. देवळा पोलिसांनी घटनेचा पंचनामा केला असून अज्ञात वाहनाविरूध्द गुन्हा दाखल करण्यात आला आहे.