याप्रकरणी पोलिसांनी दिलेली माहिती अशी, इगतपुरी लोहमार्ग पोलीस कर्मचारी संशयित राहुल विजय मोरे हा तळेगाव येथील चंद्रभागा अपार्टमेंटमध्ये आपली दुसरी पत्नी मयुरी व पहिल्या पत्नीपासून जन्मलेला साहील (८) व प्रिया (५) यांच्यासाेबत वास्तव्यास आहे. गेल्या महिनाभरापासून संशयित राहुल हा या दोन्ही चिमुकल्यांना मारझोड करत शारीरिक, मानसिक छळ करत होता. मात्र, शुक्रवारपासून या क्रूर निर्दयी बापाने सगळी मर्यादा ओलांडून आपल्या पोटच्या फुलांसारख्या चिमुकल्यांना वर्दीच्या बेल्टने बेदम मारहाण करत जखमी केले. प्रियाचा चेहरा पूर्णपणे सुजला अन‌् डोळ्यांखाली जखमा झाल्या तर साहिलच्या पाठीवर बेल्टने मारल्याच्या खुणा दिसून येतात. त्याची संपूर्ण पाठ लाल झाली आहे. पोलिसांनी या घटनेची गंभीर दखल घेतली असून संशयित राहुल व त्याची दुसरी पत्नी मयुरीविरुद्ध गुन्हा दाखल करत अटक केली आहे.
या घटनेने संपूर्ण समाजमन हादरून गेले असून जिल्ह्यात हळहळ व्यक्त होत आहे. आई-बाप पोटच्या मुलांच्या जिवावर कसे उठू शकतात? या विचाराने संवेदनशील माणसांची मने सुन्न झाली आहेत. कमरेला लावण्यासाठी वर्दीसोबत मिळणाऱ्या चामडी पट्ट्याचे आसूड कोवळ्या जिवांच्या शरीरावर ओढताना या पित्याच्या निर्दयी मनाला पाझर कसा फुटला नाही? असा संतप्त प्रश्न जनसामान्यांकडून विचारला जात आहे. या दोघा संशयितांविरुद्ध तीव्र संतापाची लाट इगतपुरी तालुक्यासह संपूर्ण जिल्ह्यात पसरली आहे. मानवी हृदय हेलावून टाकणारी ही घटना अंगावर शहारे आणते.
-----
फोटो आर वर १७पोलीस/ १७साहिल/ १७प्रिया नावाने सेव्ह आहे.