गुजरातचे चार साईभक्त अपघातात ठार काळाचा घाला:

मध्यरात्री झाडावर कार आदळल्याने झाला अपघात

नाशिक : गुजरातमधील वापी शहरात राहणारे चौघे मित्र शिर्डी येथील साईबाबा यांच्या दर्शनासाठी निघाले असताना शनिवारी (दि.१३) मध्यरात्री पेठरोडवरील एका चिंचेच्या झाडावर त्यांची मोटार जाऊन आदळली. अपघात एवढा भीषण होता की, मोटारीचा चक्काचूर झाला. या अपघातात मोटारीमधील चौघे तरुण ठार झाल्याची दुर्दैवी घटना घडली आहे. गुजरात येथून चौघे मित्र शिर्डी दर्शनासाठी वरना मोटारीने (जी.जे. १५ पीपी ६८१७) नाशिकमार्गे जात होते. दरम्यान, शहरामध्ये प्रवेश करण्यापूर्वीच पेठरोडवर या तरुण साईभक्तांवर काळाने घाला घातला. चालकाचे वाहनावरील नियंत्रण सुटल्याने मोटार थेट रस्त्याच्या डाव्या बाजूस असलेल्या मोठ्या झाडावर जाऊन आदळली. या अपघातात पंकज भिकनभाई मोरे (२९), अतिक समद शेख (३०), जयकिशोर प्रभाकर (२७), विरल रमेश पटेल (२७) सर्व राहणार वापी यांचा मृत्यू झाला. पटेल यांचा उपचारादरम्यान रुग्णालयात मृत्यू झाला, तर उर्वरित तिघे जागीत ठार झाले. घटनेची माहिती मिळताच पंचवटी पोलिसांनी घटनास्थळी धाव घेतली. दरम्यान, मोटारीची अपघातामुळे बिकट अवस्था झाली होती. त्यामुळे गंभीर जखमी झालेले पटेल यांना बाहेर काढताना अडचणी निर्माण झाल्या. अखेर पोलिसांनी पंचवटी अग्निशामक दलाची मदत घेतली. जवानांनी घटनास्थळी पोहचत इलेक्ट्रिक कटर यंत्राने मोटारीचा दरवाजा कापून जखमींसह मयत तरुणांचे मृतदेह बाहेर काढले. जखमी झालेले पटेल यांना तत्काळ रुग्णवाहिकेतून रुग्णालयात हलविले, तर अन्य तरुणांचे मृतदेह शवविच्छेदनासाठी जिल्हा शासकीय रुग्णालयात रवाना करण्यात आले. मयत तरुणांपैकी शेख हे विवाहित होते.