भरधाव आयशरने दुचाकीस्वारास चिरडले

सिडकोत अपघातांची मालिका : महिनाभरात तिघांचा आयशरखाली मृत्यू; नागरिकांचा संताप

सिडको : उत्तमनगरमधील वृद्धेचा आयशरखाली सापडून मृत्यू झाल्याची घटना ताजी असतानाच रविवारी (दि़१९) सायंकाळी पुन्हा भरधाव आयशरच्या धडकेत २१ वर्षीय दुचाकीस्वाराचा मृत्यू झाल्याची घटना सिडकोतील डीजीपीनगरमध्ये घडली़ या अपघातात मृत्युमुखी पडलेल्या युवकाचे नाव किरण साहेबराव सूर्यवंशी (२१, स्वामी समर्थ केंद्राजवळ, खुटवडनगर, सिडको, नाशिक, मूळ रा़ मुंगसे, ता़ मालेगाव) असे आहे़ या प्रकरणी अंबड पोलिसांनी आयशर चालकाविरोधात गुन्हा दाखल केला आहे़अंबड पोलिसांनी दिलेल्या माहितीनुसार खुटवडनगरमधील किरण साहेबराव सूर्यवंशी हा युवक अंबड औद्योगिक वसाहतीतील एका कंपनीत कामास होता़ रविवारी सायंकाळी साडेसहा वाजेच्या सुमारास किरण होंडा डिओ दुचाकीवरून (एमएच १५, एफई ०६९७) घरी येत होता़ तो माउली लॉन्सकडून खुटवडनगरला जात असताना डीजीपीनगर मिठास कॉर्नरजवळील पेट्रोलपंपासमोरून भरधाव येणाऱ्या आयशर वाहनाने (एमएच १५, एजी १९८) त्यास कट मारला़ यामुळे किरण सूर्यवंशी हा आयशरच्या मागील चाकाखाली सापडला़ त्यामध्ये त्याच्या डोक्यास व छातीस गंभीर दुखापत झाल्याने त्याचा जागीच मृत्यू झाला़ या अपघातानंतर नागरिकांनी मोठी गर्दी केली होती़ किरण हा एकुलता एक मुलगा असून त्याच्या पश्चात आई, वडील व एक बहीण असा परिवार आहे़ दरम्यान, आदित्य खैरनार यांनी दिलेल्या फिर्यादीवरून अंबड पोलिसांनी आयशरचालक बाळू वामन चव्हाण (५०, रा़ म्हाडा कॉलनी, अंबड लिंक रोड, सातपूर) विरोधात अपघाताचा गुन्हा दाखल केला असून त्यास अटक केली आहे़ (प्रतिनिधी)