-------
इंदिरानगर : माहेरून पैसे आणण्यासाठी वारंवार शारीरिक व मानसिक छळ करत विवाहितेवर अत्याचार करून तिला आत्महत्येस प्रवृत्त केल्याप्रकरणी सासरच्या लोकांना इंदिरानगर पोलिसांनी अटक केली आहे. गुरुवारी पाथर्डी शिवारातील एका विहिरीत आपल्या सहा महिन्यांच्या मुलीसह विवाहितेने उडी घेऊन आत्महत्या केल्याची घटना उघडकीस आली होती.
माहेरून पैसे आणत नसल्याने सविता शरद सोनवणे (रा. पांडवनगरी) या विवाहितेचा सासरच्या लोकांकडून वारंवार शारीरिक व मानसिक छळ केला जात होता. या छळाला कंटाळून अखेर सविता हिने आपल्या सहा महिन्यांच्या मुलीलासोबत विहिरीत उडी घेत गुरुवारी (दि. ८) रात्रीच्या सुमारास पाथर्डी गावातील एका मळ्यातील विहिरीत उडी घेऊन मृत्यूला कवटाळले. या घटनेत चिमुकलीचाही बळी गेला आहे. याप्रकरणी पीडित विवाहितेचे वडील फिर्यादी सुखदेव विठोबा कांगणे यांनी इंदिरानगर पोलीस ठाण्यात फिर्याद दिली असून, सासरच्या लोकांकडून वारंवार होणाऱ्या छळापायी मुलीने माझ्या नातीसह आपले जीवन संपविल्याचे म्हटले आहे. इंदिरानगर पोलिसांनी संशयित शरद सोनवणे (पती), हिराबाई सोनवणे (सासू), गोरख सोनवणे (दीर), शिवाजी सोनवणे (दीर), अर्चना सोनवणे (जाऊ) यांच्याविरुद्ध विवाहितेचा छळ करत तिला आपल्या लहान मुलीसह आत्महत्या करण्यास भाग पाडल्याप्रकरणी गुन्हा दाखल करून अटक केली आहे.