२२ लाखांच्या विदेशी मद्यसाठ्याची लूट

नाशिक : मुंबईकडे विदेशी मद्य घेऊन जाणाऱ्या आयशर वाहनाच्या चालकाचे कारमध्ये आलेल्या संशयितांनी अपहरण करून मद्यसाठा व वाहन असा सुमारे २९ लाख ४४ हजार रुपयांच्या मुद्देमालाची लूट केल्याची घटना घडली आहे़

 नाशिक : मुंबईकडे विदेशी मद्य घेऊन जाणाऱ्या आयशर वाहनाच्या चालकाचे कारमध्ये आलेल्या संशयितांनी अपहरण करून मद्यसाठा व वाहन असा सुमारे २९ लाख ४४ हजार रुपयांच्या मुद्देमालाची लूट केल्याची घटना मुंबई-आग्रा महामार्गावरील वाडीवऱ्हे शिवारात रात्रीच्या सुमारास घडली आहे़ याप्रकरणी वाडीवऱ्हे पोलीस ठाण्यात पाच संशयितांवर गुन्हा दाखल करण्यात आला आहे़वाडीवऱ्हे पोलिसांनी दिलेल्या माहितीनुसार दिंडोरी तालुक्यातील लखमापूर फाट्याजवळ असलेल्या मॅकडॉवेल कंपनीच्या विदेशी मद्याचे ६०० बॉक्स मुंबईतील कांदिवली येथील गुदामात आयशरमधून (एमएच ४१, जी ७०२९) नेले जात होते़ आयशरचालक नीलेश बापू देसले (२८, रा़ शांती चौक, पवननगर, सिडको) हा सोमवारी (दि़ ६) रात्री अकरा वाजेच्या सुमारास मुंबई-आग्रा महामार्गाजवळील रायगडनगरमधून मुंबईकडे आयशर घेऊन जात होता़ रायगडनगर शिवारातून जात असताना एका काळ्या रंगाच्या कारमधून आलेल्या संशयितांनी आयशरला कार आडवी लावून गाडी थांबविली़ त्यापैकी एकाने आयशर चालकास लहान मुलाला धडक दिल्याच्या कारणावरून खाली खेचून मारहाण करण्यास सुरुवात केली़ यानंतर आयशर चालक देसले यांचे दोन्ही मोबाइल बळजबरीने काढून घेतले तर एकाने आयशरचा ताबा घेत तो पळवून नेला़ यानंतर उर्वरित चौघांनी देसलेला कारमध्ये बळजबरी बसवून घेत घोटी-सिन्नर रोडवरील विराज हॉटेलच्या पुढे नेऊन सोडून दिले़ (प्रतिनिधी)