भुजबळ समर्थनार्थ बैठकीकडे अनेकांची पाठ

भुजबळ समर्थनार्थ बैठकीकडे अनेकांची पाठ

नाशिक : माजी उपमुख्यमंत्री छगन भुजबळ यांच्या समर्थनार्थ सोमवारी (दि.३) काढण्यात येणाऱ्या विराट मोर्चासाठी राष्ट्रवादी कॉँग्रेस भवनात जिल्हा परिषदेतील राष्ट्रवादी कॉँग्रेस सदस्यांची बैठक घेण्यात आली. मंगळवारी दुपारी राष्ट्रवादी भवनात जिल्हा परिषद पदाधिकारी व सदस्यांची तातडीची बैठक बोलविण्यात आली होती. या बैठकीत ३ आॅक्टोबर रोजी काढण्यात येणाऱ्या मोर्चाविषयी चर्चा करण्यासाठी बैठकीचे आयोजन करण्यात आले होते. या बैठकीस जिल्हा परिषद अध्यक्ष विजयश्री चुंबळे, सभापती उषा बच्छाव, किरण थोरे यांच्यासह सदस्य व प्रदेश उपाध्यक्ष डॉ. भारती पवार, कार्याध्यक्ष विष्णुपंत म्हैसधुणे, सदस्य गोरख बोडके, शैलेश सूर्यवंशी, ज्योती माळी, अलका जाधव, साईनाथ मोरे तसेच सदस्य सुजाता वाजे यांचे पती सुनील वाजे आदि उपस्थित होते. जिल्हाध्यक्ष अ‍ॅड. रवींद्र पगार यांनी मार्गदर्शन केले. ३ आॅक्टोबर रोजी भुजबळ यांच्या समर्थनार्थ काढण्यात येणाऱ्या मोर्चास जिल्हा परिषद सदस्य व पदाधिकाऱ्यांनी उपस्थित राहावे, असे आवाहन जिल्हाध्यक्ष अ‍ॅड. पगार यांनी केले. (प्रतिनिधी)