नाशिक @ 9.2

तपमानात घसरण : हवेचा वेग अन् गारव्यात वाढ

नाशिक : या आठवड्यात नाशिकमध्ये थंडी पुन्हा परतली असून, हवेचा वेग आणि त्यामध्ये वाढलेला गारवा यामुळे नाशिककरांना हुडहुडी भरत आहे. गेल्या शुक्रवारी शहराचे किमान तपमान सर्वांत कमी ८.३ अंशावर घसरले तर मंगळवारी (दि.२७) पारा अचानकपणे पुन्हा ८.४ वर आल्याने थंडीचा कडाका या आठवड्यात कायम राहिला. बुधवारी किमान तपमान ९.२ इतके नोंदविले गेले.आठवडाभरापासून नाशिककरांना कडाक्याच्या थंडीचा सामना करावा लागत आहे. बारा दिवसांपूर्वी राज्यात किमान तपमान सर्वांत कमी ७.५ अंश इतके नोंदविले गेले होते. नोव्हेंबर महिन्यात किमान तपमान ९.० अंशांच्या जवळपासच होते; मात्र या महिन्याच्या दुसऱ्या आठवड्यात शनिवारी (दि.१०) पारा ७.५ अंशांपर्यंत घसरल्याने प्रथमच हंगामातील नीचांकी तपमानाची नोंद करण्यात आली होती. एकूणच चालू महिन्यात पारा ७ अंशापर्यंत गेल्याने या महिन्यात नाशिककरांनी खऱ्या अर्थाने थंडीचा अनुभव घेतला. बुधवारी पारा वाढल्याने नाशिककरांना मागील काही दिवसांपूर्वीच्या थंडीच्या तीव्रतेपासून अल्पसा दिलासा मिळाला आहे. शहरासह जिल्ह्यात थंडीची लाट तीव्र स्वरूपाची असून, निफाड तालुका अग्रस्थानी आहे. निफाडमधील सर्वच लहान-मोठ्या खेड्यांमधील नागरिक गारठले आहेत. ग्रामीण भागासह शहरातील विविध उपनगरांमध्ये संध्याकाळनंतर शेकोट्या पेटवून त्याभोवती नागरिक गप्पा मारताना दिसून येत आहेत.