नववर्षाच्या स्वागताची जय्यत तयारी

पार्ट्यांचे नियोजन : हॉटेल्सकडून पॅकेजेस्, खरेदीवर आॅफर्स

नाशिक : सरते वर्ष संपण्यात आणि नवीन वर्ष सुरू होण्यास अवघे काही दोन दिवस शिल्लक असून, त्यामुळे नव्या वर्षाच्या स्वागताची जय्यत तयारी सुरू आहे. शहराच्या विविध हॉटेलमध्ये रंगणाऱ्या पार्ट्यांसाठी विविध पॅकेजेस जाहीर करण्यात येत असून, सोशल मीडियावरही न्यू इयर्स इव्ह इफेक्ट जाणवत आहे.३१ डिसेंबर म्हणजे सरत्या वर्षाला निरोप देतानाच नव्या वर्षाचे जल्लोषात स्वागत करण्याची तयारी सुरू आहे. कुठे कौटुंबिक स्नेहमिलन, तर कुठे साग्रसंगीत पार्ट्यांच्या चर्चा झडत आहेत. शहरात नव्या वर्षाच्या स्वागताच्या तयारीसाठी बाजारपेठाही सज्ज आहेत. विशेषत: शहरातील हॉटेल्स व्यावसायिकांनी वेगवेगळ्या आॅफर्स जाहीर केल्या आहेत. वाइन अ‍ॅन्ड डाईनचे पॅकेजेसही उपलब्ध आहेत. अगदी दोनशे रुपयांपासून पाच हजार रुपयांपर्यंतचे पॅकेज उपलब्ध आहेत. समवेत डान्स आणि म्युझिक शोदेखील होणार आहेत. काही हॉटेल चालकांचे सेलिब्रेटींना बोलविण्याचा प्रयत्न असून, वाइन अ‍ॅन्ड डाइन अशा शोचे तिकीटही अधिक ठेवण्यात येईल असे सांगण्यात आले. काही हॉटेल्समध्ये तर विशेष मेन्यूचे नियोजन करण्यात आले आहे. शहरातील मोठ्या हॉटेल्सप्रमाणेच अन्य छोट्या पार्सल पॉर्इंटवरही मागणी जोरात आहे. आगाऊ नोंदणी करणाऱ्यांना खास सवलत देण्यात येणार आहे.नव्या वर्षाच्या स्वागताचा बाजारपेठेवरही प्रभाव जाणवत असून, फ्लॅटपासून गृहोपयोगी वस्तू मोबाइल या साऱ्यांवरच मोठ्या आॅफर्स आल्या आहेत. आॅनलाइन शॉपिंगमध्येही अशाच प्रकारे आॅफर्स दिल्या जात आहेत, त्यामुळे बाजारपेठेत आर्थिक उलाढाल मोठ्या प्रमाणात वाढणार आहेत. (प्रतिनिधी)