नाशिक : पेठेनगर कॉर्नर येथील प्रगती मार्केटमधील एका मोबाईल विक्रीच्या दुकानाचे अज्ञात चोरट्यांनी गॅस कटरने शटर कापून दुकानात प्रवेश करत सुमारे ५ लाख रुपयांचा माल गायब केल्याची घटना बुधवारी (दि.३) सकाळी उघडकीस आली. मध्यरात्री चोरट्यांनी दुकानाला लक्ष्य करत विक्रीसाठी असलेले मोबाईल, ब्ल्युटुथ स्पीकर, पॉवर बँक, लॅपटॉप अशा महागड्या वस्तु चोरट्यांनी लुटून पोबारा केला आहे.प्रगती मार्केटमध्ये प्रितेश विजय कुमार कोठारी यांचे मागील दोन वर्षापासून मोबाईल शॉपी चे दुकान आहे. नेहमीप्रमाणे मंगळवारी (दि.२) रात्री साडेनऊ वाजता ते दुकान बंद करून घरी गेले. बुधवारी सकाळी नेहमीप्रमाणे पावणे आठ वाजेच्या सुमारास त्यांना येथील कामगार गोपाल प्रजापती यांनी संपर्क करत दु्कानाचे शटर कापून चोरी झाल्याचे दिसत असल्याचे सांगितले. माहिती मिळताच प्रितेश हे दुकानाजवळ पोहचले. दुकानाचे शटर कापलेले आणि काचेचा दरवाजा तोडलेला त्यांना आढळून आला. त्यांनी तातडीने याबाबत पोलिसांना माहिती दिली. तातडीने घटनास्थळी पोलीस उपआयुक्त विजय खरात, सहाय्यक आयुक्त अशोक नखाते, वरिष्ठ पोलीस निरीक्षक नीलेश माईनकर यांनी धाव घेत पाहणी केली केली.चोरट्यांनी ३५ मोबाईल, २० ब्लूटूथ स्पीकर, ६०पॉवर बँक,१७ एअर पॅड, लॅपटॉप व सॉफ्टवेअर असा एकूण सुमारे ५ लाख २ हजार रुपयांचा ऐवज चोरट्यांनी गायब केल्याची फिर्याद कोठारी यांनी इंदिरानगर पोलीस ठाण्यात दिली आहे. यानुसार पोलिसांनी अज्ञात चोरट्यांविरुध्द घरफोडीचा गुन्हा दाखल केला आहे.'चादर गँग'चे कृत्य सीसीटीव्हीत कैदपहाटे साडेचार वाजेच्या सुमारास चारचाकीमधून आलेल्या अज्ञात चोरट्यांनी या दुकानाभोवती चादरीचा आडोसा धरत गॅस कटरद्वारे शटर कापून दुकानात प्रवेश करत मिळेल त्या वस्तु बॅगेत भरुन पोबारा केल्याची घटना या दुकानाशेजारी असलेल्या दुसऱ्या दुकानाच्या सीसीटीव्ही कॅमेऱ्यात कैद झाली आहे. चोरट्यांनी प्रितेश यांचे दुकान फोडल्यानंतर या दुकानातील सीसीटीव्ही कॅमेरे आणि डीव्हीआरसुध्दा सोबत नेला आहे. जेणेकरुन पोलिसांना माग काढता येणार नाही; मात्र शेजारील दुकानाच्या कॅमेऱ्यांनी त्यांचा हा प्रताप टिपल्याने पोलीस त्याअधारे तपास करत आहेत. दोन पथके तयार करुन चोरट्यांच्या मागावर धाडण्यात आली आहेत.