महाराष्ट्र नवनिर्माण सेनेचे अध्यक्ष राज ठाकरे यांनी कृष्ण कुंजवर मंगळवारी (दि.७) नाशिक जिल्हाध्यक्ष, शहर अध्यक्ष तसेच सहाही विभाग अध्यक्षांसोबत आगामी नाशिक मनपा निवडणुकीच्या पार्श्वभूमीवर संघटना बांधणी तसेच शाखा अध्यक्ष नेमणुकीसंदर्भात बैठक घेतली.
यावेळी ठाकरे व मनसेचे नेते यांनी विभाग अध्यक्षांबरोबर प्रथम वेगवेगळी व नंतर एकत्रितपणे भेट घेऊन पक्ष बांधणीबाबत सविस्तर चर्चा केली. येत्या २१ सप्टेंबर राेजी युवा नेते अमित ठाकरे सर्व प्रमुख नेते आणि २२ तारखेपासून स्वतः राज ठाकरे नाशिक भेटीवर येणार आहे. याच दिवशी सर्व नूतन शाखा अध्यक्षांच्या नेमणुका व २३ तारखेला सर्व सहाही विभाग अध्यक्ष, शाखा अध्यक्षांचा एकत्रित मेळावा होणार होणार आहे, अशी माहिती मनसेचे जिल्हाध्यक्ष दिलीप दातीर यांनी दिली.
मंगळवारी झालेल्या बैठकीस अमित ठाकरे तसेच बाळा नांदगावकर, नितीन सरदेसाई, शिरीष सावंत, संदीप देशपांडे, अविनाश जाधव व योगेश परुळेकर, शहराध्यक्ष अंकुश पवार, विभाग अध्यक्ष भाऊसाहेब निमसे, सत्यम खंडाळे, रामदास दातीर, नितीन साळवे, विक्रम कदम व योगेश लभडे आदी उपस्थित होते.