उसाच्या शेतात आढळला कुजलेला मृतदेह

सिन्नर बायपासलगत अरुण मोरे यांच्या उसाच्या शेतात सकाळी साडेआठच्या सुमारास अज्ञात व्यक्तीचा कुजलेला मृतदेह आढळून आला.

सिन्नर : सिन्नर बायपासलगत अरुण मोरे यांच्या उसाच्या शेतात सकाळी साडेआठच्या सुमारास अज्ञात व्यक्तीचा कुजलेला मृतदेह आढळून आला. माजी नगरसेवक पंकज मोरे यांनी या प्रकरणी पोलिसांना माहिती दिली. त्यावरून पोलीस ठाण्यात अकस्मात मृत्यूची नोंद करण्यात आली. मोरे यांच्या शेतातील ऊसतोडणीसाठी कामगार गेले होते. अचानक कुजलेला मृतदेह पाहिल्यानंतर ते घाबरून पळाले. याबाबत शेतमालक अरुण मोरे यांना माहिती देण्यात आली. पंकज मोरे यांनी पोलिसांना माहिती दिल्यानंतर साहाय्यक निरीक्षक विजय माळी यांच्या मार्गदर्शनाखाली पथकाने घटनास्थळी धाव घेतली. अज्ञात मृतदेहाला शीर व हात नव्हते. मात्र त्याला कुठे मारहाण वगैरे झाल्याच्या खुणा नसल्याचे वैद्यकीय अधिकाऱ्यांना आढळून आले. एखाद्या जंगली श्वापदाने भिकारी अथवा वाटसरू मजुराची शिकार केली असावी, असा अंदाज पोलिसांनी व्यक्त केला. पोलीस उपअधीक्षक सोमनाथ तांबे यांनी घटनास्थळी पाहणी केली. पोलीस नाईक चेतन मोरे यांच्यासह कर्मचाऱ्यांनी देवनदी तीरावर मृतदेहावर अंत्यसंस्कार केले.