सिडको प्रभागात विशेष स्वच्छता मोहिमेस प्रारंभ

सिडको प्रभागात विशेष स्वच्छता मोहिमेस प्रारंभ

सिडको : महापालिकेच्या सिडको आरोग्य विभागाच्या वतीने संपूर्ण सिडको प्रभागात दिवस व रात्र या दोन्ही वेळांमध्ये विशेष स्वच्छता मोहीम राबविण्यात येत आहे. सिंहस्थाच्या पार्श्वभूमीवर नाशिक शहरात सर्र्वत्र विकासकामे केली जात असून, याचाच एक भाग म्हणून मनपा आयुक्त डॉ. प्रवीण गेडाम यांच्या आदेशान्वये संपूर्ण सिडको प्रभागांमध्ये दिवस व रात्र अशा दोन वेळांमध्ये विशेष स्वच्छता मोहीम राबविण्यात येत आहे. मनपा सिडको आरोग्य विभागाचे प्रमुख राजेंद्र गाजरे यांच्या नेतृत्त्वाखाली दिवस व रात्र या दोन्ही वेळांत सिडको प्रभागातील चौका-चौकात तसेच मुख्य व अंतर्गत रस्त्यांची स्वच्छता मोहीम राबविली जात आहे. यावेळी सुमारे वीस ते पंचवीस कर्मचारी या मोहिमेत सहभागी झाले आहे. प्रभागनिहाय सुरू करण्यात आलेल्या या मोहिमेत रस्त्यावरील साचलेली घाण, कचरा गोळा करणे, साफ सफाई करणे आदि कामे केली जात आहे. एकाच वेळी परिसरात वीस ते पंचवीस कर्मचारी, साफ-सफाई करीत असल्याने नागरिकांनी समाधान व्यक्त केले आहे. सदर मोहिमेप्रसंगी मनपा आरोग्य विभागाचे रवि जाधव, दीपक लोळगे यांच्या मार्गदर्शनाखाली स्वच्छता मोहीम राबविण्यास येत आहे. (वार्ताहर)