कोटंबी घाटातील ‘त्या’ मृतदेहाची ओळख पटली

पेठ : तालुक्यातील कोटंबी घाटात बेवारस स्थितीत सापडलेल्या मृतदेहाची ओळख पटली असून, मृत निफाड येथील सचिन श्यामराव दुसाने असल्याचे पोलीस तपासात निष्पन्न झाले. याबाबत पेठ पोलिसांनी दिलेल्या माहितीवरून नाशिक ते पेठ राष्ट्रीय मार्गावरील कोटंबी घाटात (दि. २५) अनोळखी मृतदेह आढळून आल्याची माहिती पेठ पोलिसांत दाखल करण्यात आली. प्रारंभी अकस्मात मृत्यूची नोंद करण्यात आली. मात्र शवविच्छेदनानंतर डोक्याच्या मागील भागावर घाव मारल्याचे व तोंडावरही मार दिल्याच्या खुणा दिसून आल्याने पेठ पोलिसांनी खुनाचा गुन्हा दाखल करून तपास सुरू केला असता निफाड पोलीस ठाण्यात रोहित दुसाने यांनी सचिन शामराव दुसाने हे भद्रा मारुतीच्या दर्शनासाठी गेल्याची मिसिंग केस दाखल असल्याचे तपासात निष्पन्न झाले. पोलीस निरीक्षक दिवाणसिंग वसावे यांच्या मार्गदर्शनाखाली सहायक पोलीस निरीक्षक संदीप वसावे, पोलीस नाईक दिलीप रेेहरे यांनी सर्वत्र मृतदेहाची ओळख पटविण्यासाठी आवाहन केल्याच्या प्रयत्नांना यश आले. नातेवाइकांना पाचारण करून मृतदेहाची ओळख पटवून तो नातेवाइकांच्या ताब्यात देण्यात आला. मृत व्यक्ती व्यावसायिक असल्याने हा घातपात नेमका कसा झाला याचे गूढ वाढले असून, पेठ पोलीस अधिक तपास करीत आहेत.