धोडंबेत आढळले तिघांचे मृतदेह

धोडंबेत आढळले तिघांचे मृतदेह

वडाळीभोई : धोडंबे येथील वाडी रस्त्यावरील विनायक सोनवणे यांनी सून सुजाता शरद सोनवणे (२९) व नातवंडे गीता (६), निकिता (४) यांचा शेततळ्यात पडून मृत्यू झाला. बुधवारी सायंकाळी ७ वाजेच्या दरम्यान सुजाता सोनवणे ह्या आपल्या दोन मुली गीता व निकिता यांना सोबत घेऊन शौचास जाते असे सांगून गेल्या. रात्री उशिरापर्यंत घरी न परतल्यामुळे घरच्या लोकांनी त्यांची शोधाशोध सुरू केली. घराजवळील शेततळ्यात लहान मुलीची चप्पल आढळून आल्याने घरच्या लोकांनी शेततळ्यात शोधमोहीम सुरू केली. धोडंबेचे सरपंच पोपट दादा उशीर, पोलीसपाटील संपत पाटील, तुकाराम गायकवाड, उत्तम सोनवणे यांनी ग्रामस्थांसह शेततळ्यात गळ टाकून शोध घेतला असता रात्रीच्या सुमारास गीताचा मृतदेह सापडला. गुरुवारी १२ वाजेपर्यंत सुजाता सोनवणे व निकिता सोनवणे यांचे मृतदेह सापडले. तीनही मृतदेहांचे शवविच्छेदन करून मृतदेह नातलगांच्या स्वाधीन करण्यात आले.(वार्ताहर)सायंकाळी ५ वाजेच्या सुमारास धोडंबे येथील अमरधाममधे तीनही मृतांवर अंतिम संस्कार करण्यात आले. या घटनेसंदर्भात वडाळीभोई पोलीस ठाण्यात अकस्मात मृत्यूची नोंद करण्यात आली असून, सहायक पोलीस निरीक्षक सी.बी. इमले यांच्या मार्गदर्शनाखाली तनपुरे, शेख, रमेश बोरसे, पुंडलीक मोरे अधिक तपास करत आहेत. दरम्यान या दुर्घटनेमुळे गावात मात्र तर्कविर्तक केले जात असून, पोलीस त्या दृष्टीनेही तपास करीत आहेत. (वार्ताहर)——-